ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

30 հունիսի 2022 թվականի N 1003-Ն

ԱՐՏԱՄԱՐՄՆԱՅԻՆ ԲԵՂՄՆԱՎՈՐՄԱՆ ԵՂԱՆԱԿՈՎ ՍՏԱՑՎԱԾ ԵՎ ՉՕԳՏԱԳՈՐԾՎԱԾ ՍԱՂՄԵՐԻ ԱՆՀԱՏՈՒՅՑ ՏՐԱՄԱԴՐՄԱՆ, ՈՉՆՉԱՑՄԱՆ ԿԱՄ ՊԱՀՊԱՆՄԱՆ ՎԵՐԱԲԵՐՅԱԼ ԳՐԱՎՈՐ ՀԱՄԱՁԱՅՆՈՒԹՅԱՆ ՁԵՎԸ, ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՍԴՐՈՒԹՅԱՄԲ ՍԱՀՄԱՆՎԱԾ ԿԱՐԳՈՎ ԳՐԱՆՑՎԱԾ ԱՄՈՒՍՆՈՒԹՅԱՆ ՄԵՋ ԳՏՆՎՈՂ ԿՆՈՋԸ (ԱՄՈՒՍՆՈՒՆ) ԿԱՄ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՍԴՐՈՒԹՅԱՄԲ ՍԱՀՄԱՆՎԱԾ ԿԱՐԳՈՎ ԳՐԱՆՑՎԱԾ ԱՄՈՒՍՆՈՒԹՅԱՆ ՄԵՋ ՉԳՏՆՎՈՂ ԿՆՈՋԸ ԿԱՄ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՍԴՐՈՒԹՅԱՄԲ ՍԱՀՄԱՆՎԱԾ ԿԱՐԳՈՎ ԳՐԱՆՑՎԱԾ (ՎԱՎԵՐ ՃԱՆԱՉՎԱԾ) ԱՄՈՒՍՆՈՒԹՅԱՆ ՄԵՋ ՉԳՏՆՎՈՂ ԵՎ ՀԱՅԿԱԿԱՆ ԾԱԳՈՒՄ ՈՒՆԵՑՈՂ՝ ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԳՏՆՎՈՂ ԿԱՄ ԲՆԱԿՎՈՂ ՕՏԱՐԵՐԿՐԱՑԻ ԶՈՒՅԳԻՆ ԿԱՄ ԿՆՈՋԸ ՍԱՂՄԻ ԱՆՀԱՏՈՒՅՑ ՏՐԱՄԱԴՐՄԱՆ ԿԱՐԳՆ ՈՒ ՊԱՅՄԱՆՆԵՐԸ ՍԱՀՄԱՆԵԼՈՒ ՄԱՍԻՆ

Հիմք ընդունելով «Մարդու վերարտադրողական առողջության և վերարտադրողական իրավունքների մասին» Հայաստանի Հանրապետության օրենքի 14.1-ին հոդվածի 2-րդ մասը` Հայաստանի Հանրապետության կառավարությունը որոշում է.

1. Սահմանել`

1) արտամարմնային բեղմնավորման եղանակով ստացված և չօգտագործված սաղմերի անհատույց տրամադրման, ոչնչացման կամ պահպանման վերաբերյալ գրավոր համաձայնության ձևը՝ համաձայն N 1 հավելվածի.

2) Հայաստանի Հանրապետության օրենսդրությամբ սահմանված կարգով գրանցված ամուսնության մեջ գտնվող կնոջը (ամուսնուն) կամ Հայաստանի Հանրապետության օրենսդրությամբ սահմանված կարգով գրանցված ամուսնության մեջ չգտնվող կնոջը կամ Հայաստանի Հանրապետության օրենսդրությամբ սահմանված կարգով գրանցված (վավեր ճանաչված) ամուսնության մեջ չգտնվող և հայկական ծագում ունեցող՝ Հայաստանի Հանրապետությունում գտնվող կամ բնակվող օտարերկրացի զույգին կամ կնոջը սաղմի անհատույց տրամադրման կարգն ու պայմանները՝ համաձայն N 2 հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության վարչապետ	Ն. ՓԱՇԻՆՅԱՆ
Երևան

01.07.2022 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Հավելված N 1 ՀՀ կառավարության 2022 թվականի հունիսի 30-ի N 1003-Ն որոշման

ՁԵՎ

ԱՐՏԱՄԱՐՄՆԱՅԻՆ ԲԵՂՄՆԱՎՈՐՄԱՆ ԵՂԱՆԱԿՈՎ ՍՏԱՑՎԱԾ ԵՎ ՉՕԳՏԱԳՈՐԾՎԱԾ ՍԱՂՄԵՐԻ ԱՆՀԱՏՈՒՅՑ ՏՐԱՄԱԴՐՄԱՆ, ՈՉՆՉԱՑՄԱՆ ԿԱՄ ՊԱՀՊԱՆՄԱՆ ՎԵՐԱԲԵՐՅԱԼ ԳՐԱՎՈՐ ՀԱՄԱՁԱՅՆՈՒԹՅԱՆ

Քաղաք ______________

«_______» ___________202_թ.

1. ՀՀ քաղաքացի _______________ /ծնված՝ _________________թ., անձնագիր_________________, տրված՝ «_______ »_______________ 20 թ. -ի կողմից, հաշվառված_______________ հասցեում և ՀՀ քաղաքացի________________________ /ծնված՝ ____________________ թ., անձնագիր________________________, տրված՝ «______»___________________ 20 թ. -ի կողմից, հաշվառված___________________ , մի կողմից և ________________________ բժշկական կազմակերպությունը (այսուհետ՝ կազմակերպություն), ի դեմս տնօրեն ______________________, որը գործում է ընկերության կանոնադրության հիման վրա, կնքեցինք սույն համաձայնագիրը հետևյալի մասին. ՀՀ քաղաքացի______________ (ծնված՝ __________________թ., անձնագիր __________________ , տրված՝__________ թ. ____________ -ի կողմից, հաշվառված հասցեով և ՀՀ քաղաքացի ____________________________ /ծնված՝______________________ թ., անձնագիր ____________________ , տրված`______________ թ. ____________________ -ի կողմից, հաշվառված___________________ /(այսուհետ՝ սաղմի դոնոր/դոնորներ) սույնով տալիս են իրենց համաձայնությունը _____________________ կազմակերպությունում արտամարմնային բեղմնավորման եղանակով ստացված և չօգտագործված իրենց թվով սաղմը/սաղմերը՝ 1) □ անհատույց տրամադրել___________________________ կազմակերպությանը` դոնորական սաղմի կարիք ունեցող զույգին կամ կնոջը (այսուհետ՝ ռեցիպիենտ) անհատույց տրամադրելու համար 2) □ պահպանել կազմակերպությունում`_____________________________ դրամի հատուցման դիմաց` մինչև սույն համաձայնությամբ նախատեսված_____________________________ ժամկետը: 3) □ ոչնչացնել 2. Ես/մենք տեղեկացված եմ/ենք և համաձայն եմ/ենք, որ սույն համաձայնության 1-ին կետի երկրորդ ենթակետով նախատեսված սաղմի պահպանման ժամկետը լրանալուց հետո՝ մեկ ամսվա ընթացքում, սաղմի պահպանման ծառայություն ստանալու մասին իմ/մեր ցանկությունն ամրագրող նոր գրավոր համաձայնություն չտալու դեպքում լիազորում եմ կազմակերպությանը՝ 1) □ ոչնչացնել կրիոպահեստում պահպանման հանձնված սաղմը 2) □ անհատույց տրամադրել ռեցիպիենտին` սույն որոշմամբ սահմանված կարգով: 3. Քաղաքացի __________________________________ և ____________________ սույնով հայտարարում են, որ գիտակցում են իրենց որոշման հետևանքները, հաստատում են, որ այս որոշումը կայացրել են կամավոր, անկաշկանդ և որևէ պահանջ չունենք____________________ բժշկական կազմակերպությունից: 4. Մենք (ես) հաստատում եմ, որ՝ 1) հնարավորություն ենք ունեցել իմ/մեր բժշկին ուղղել սաղմի անհատույց տրամադրման գործընթացի հետ կապված բոլոր ինձ (մեզ ) հետաքրքրող հարցերը և ստանալ դրանց պատասխանները. 2) մեր բժիշկն առաջարկել է սաղմերը պահպանել, որպեսզի ապագայում հղիանալու հնարավորություն ունենանք: Ես/մենք հրաժարվել ենք ընդունել այս տարբերակը: 5. Սույն համաձայնության 1-ին կետի 1-ին ենթակետով կամ 2-րդ կետի 2-րդ ենթակետով սահմանված տարբերակը դոնորի կողմից ընտրելու դեպքում լրացվում է իրազեկման թերթիկ՝ համաձայն N 1 ձևի: 6. ______________________________ կազմակերպությունը պարտավորվում է տնօրինել սաղմը/սաղմերը` ըստ քաղաքացի_______________ և __________________ կողմից սույն համաձայնությամբ արձանագրած կամարտահայտության, նրա/նրանց կողմից սաղմի/սաղմերի անհատույց տրամադրման դեպքում պարտավորվում է դրանք անհատույց տրամադրել ռեցիպիենտին ոչ շուտ, քան սույն համաձայնության նոտարական վավերացում ստանալու պահից հետո 3 ամիսը լրանալը` Հայաստանի Հանրապետության օրենսդրությամբ սահմանված կարգով և դեպքերում: Սույն համաձայնությունը կազմված է հավասարազոր իրավաբանական ուժ ունեցող երկու օրինակից: Յուրաքանչյուր կողմի մոտ գտնվում է համաձայնության մեկական օրինակ:

Ձև N 1

ԻՐԱԶԵԿՄԱՆ ԹԵՐԹԻԿ

1. Մենք (ես) տեղեկացված ենք (եմ), հասկանում ենք (եմ) և համաձայն ենք (եմ), որ՝

1) ես/մենք կարող ենք սույն համաձայնության նոտարական վավերացում ստանալու պահից 3 ամսվա ընթացքում հետ վերցնել իմ/մեր համաձայնությունը` սաղմի պահպանման ծախսերը փոխհատուցելու պայմանով.

2) իմ/մեր կողմից կազմակերպությանը տրամադրած սաղմերի ցանկացած ռեցիպիենտը, կլինի անանուն և ես/մենք հնարավորություն չեմ/չենք ունենա տեղեկություն ստանալ նրա անձի վերաբերյալ.

3) իմ/մեր կողմից տրամադրված սաղմը/սաղմերը կմնան կազմակերպության կրիոպահեստում այնքան ժամանակ, մինչև տրամադրվի/տրամադրվեն և ներպատվաստվի/ներպատվաստվեն ռեցիպիենտին: Ես հասկանում եմ, որ իմ/մեր սաղմը/սաղմերը կարող են չդիմանալ ապասառեցման գործընթացին, չզարգանալ ապասառեցումից հետո, երբեք չներպատվաստվել, ներպատվաստումը ձախողվի և/կամ չհանգեցնի հղիության.

4) իմ/մեր սաղմերն անհատույց տրամադրելուց հետո չփնտրել և չստանալ որևէ տեղեկություն իմ սաղմերի վերաբերյալ, ներառյալ տեղեկությունն այն մասին, թե երբ և արդյոք իմ սաղմերն ապասառեցվել կամ ներպատվաստվել են, ինչպես նաև դրա արդյունքը.

5) վերարտադրողական օժանդակ տեխնոլոգիաների կիրառմամբ բժշկական օգնության և սպասարկման ընթացքում ձեռք բերված իմ/մեր մասին բոլոր տեղեկությունները համարվում են բժշկական գաղտնիք և ենթակա են պահպանման «Բնակչության բժշկական օգնության և սպասարկման մասին» օրենքով սահմանված կարգով, իմ/մեր բժիշկը/բժիշկներն առանց իմ/մեր համաձայնության չեն բացահայտի ոչ իմ/մեր ինքնությունը, ոչ էլ իմ/մեր հատուկ բժշկական կամ հոգեբանական տվյալները.

6) իմ/մեր անձնական տվյալների, այդ թվում ոչ հանրամատչելի (հանրային ծառայությունների համարանիշ, հեռախոսահամար, բնակության վայր), պաշտպանությունը կազմակերպության կողմից պետք է ապահովվի «Անձնական տվյալների պաշտպանության մասին» օրենքով սահմանված կարգով.

7) կազմակերպությունը տրամադրի իմ/մեր բժշկական պատմության մասին տեղեկություն պոտենցիալ ռեցիպիենտին և նրա/նրանց բժիշկներին` առանց անձնական տվյալների բացահայտման:

2. Մենք (ես) հրաժարվում ենք (եմ)

իմ/մեր սաղմերն օգտագործելու կամ դրանց վերաբերյալ որոշումներ կայացնելու բոլոր իրավունքներից: Եթե մեկ այլ զույգի կողմից իմ/մեր կրիոպահպանված սաղմերի օգտագործումը հանգեցնի երեխայի ծննդի, ես/մենք հրաժարվում ենք երեխայի նկատմամբ բոլոր իրավունքներից և պահանջներից:

3. Մենք (ես) համաձայն ենք (եմ),

որ իմ/մեր կողմից տրամադրած սաղմից/սաղմերից ծնված երեխան/ երեխաները պետք է լինեն նրանց ծնող և/կամ դաստիարակությունն ստանձնող զույգի/կնոջ օրինական երեխաները:

4. Ես/մենք հաստատում ենք, որ

ես/մենք կարդացել եմ այս ձևը, լիովին հասկանում եմ դրա բովանդակությունը, ունեցել եմ ցանկացած հարց տալու հնարավորություն, և որ իմ/մեր բոլոր հարցերին տրվել են ինձ/մեզ բավարարող պատասխաններ:

Քաղաքացի__________________________________

                                    (ԱԱՀ, անձնագրի N, ստորագրություն)

Քաղաքացի __________________________________

                                       (ԱԱՀ, անձնագրի N, ստորագրություն)

Հայաստանի Հանրապետության վարչապետի աշխատակազմի ղեկավար

Ա. Հարությունյան

01.07.2022 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Հավելված N 2 ՀՀ կառավարության 2022 թվականի հունիսի 30-ի N 1003-Ն որոշման

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՍԴՐՈՒԹՅԱՄԲ ՍԱՀՄԱՆՎԱԾ ԿԱՐԳՈՎ ԳՐԱՆՑՎԱԾ ԱՄՈՒՍՆՈՒԹՅԱՆ ՄԵՋ ԳՏՆՎՈՂ ԿՆՈՋԸ (ԱՄՈՒՍՆՈՒՆ) ԿԱՄ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՍԴՐՈՒԹՅԱՄԲ ՍԱՀՄԱՆՎԱԾ ԿԱՐԳՈՎ ԳՐԱՆՑՎԱԾ ԱՄՈՒՍՆՈՒԹՅԱՆ ՄԵՋ ՉԳՏՆՎՈՂ ԿՆՈՋԸ ԿԱՄ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՍԴՐՈՒԹՅԱՄԲ ՍԱՀՄԱՆՎԱԾ ԿԱՐԳՈՎ ԳՐԱՆՑՎԱԾ (ՎԱՎԵՐ ՃԱՆԱՉՎԱԾ) ԱՄՈՒՍՆՈՒԹՅԱՆ ՄԵՋ ՉԳՏՆՎՈՂ ԵՎ ՀԱՅԿԱԿԱՆ ԾԱԳՈՒՄ ՈՒՆԵՑՈՂ՝ ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԳՏՆՎՈՂ ԿԱՄ ԲՆԱԿՎՈՂ ՕՏԱՐԵՐԿՐԱՑԻ ԶՈՒՅԳԻՆ ԿԱՄ ԿՆՈՋԸ ՍԱՂՄԻ ԱՆՀԱՏՈՒՅՑ ՏՐԱՄԱԴՐՄԱՆ ԿԱՐԳՆ ՈՒ ՊԱՅՄԱՆՆԵՐԸ

1. Սույն հավելվածով կարգավորվում են վերարտադրողական օժանդակ տեխնոլոգիաներով տրամադրված բուժօգնության ավարտից հետո արտամարմնային բեղմնավորման եղանակով ստացված և չօգտագործված սաղմերի անհատույց տրամադրման գործընթացի հետ կապված հարաբերությունները:

2. Արտամարմնային բեղմնավորման եղանակով ստացված և չօգտագործված սաղմերի անհատույց տրամադրումը կատարվում է`

1) կենսաբանական ծնողներ (ծնող) հանդիսացող զույգի (կինը և տղամարդը) կամ Հայաստանի Հանրապետության օրենսդրությամբ սահմանված կարգով գրանցված ամուսնության մեջ չգտնվող կնոջ (այսուհետ՝ սաղմի դոնոր) կողմից` վերարտադրողական օժանդակ տեխնոլոգիաների կիրառմամբ բժշկական օգնություն և սպասարկում տրամադրող բժշկական կազմակերպությանը (այսուհետ՝ կազմակերպություն)` սույն որոշման N 1 հավելվածով հաստատված գրավոր համաձայնությամբ (ներառյալ համաձայնության N 1 ձևով հաստատված իրազեկման թերթիկը)` նոտարական վավերացմամբ, եթե դոնորի կողմից ընտրվել է գրավոր համաձայնության ձևի 1-ին կետի 1-ին ենթակետով կամ 2-րդ կետի 2-րդ ենթակետով նախատեսված տարբերակը:

3. Եթե սաղմն ստացվել է գենետիկական ծնող հանդիսացող կնոջ ձվաբջջի և դոնորական սերմնաբջջի միաձուլման արդյունքում, ապա համաձայնության կողմ և սույն որոշման իմաստով դոնոր է հանդիսանում միայն գենետիկական ծնող հանդիսացող կինը:

4. Սաղմի անհատույց տրամադրման դեպքում նոտարական ծառայության հետ կապված ծախսերի հատուցումն իրականացվում է կազմակերպության կողմից, ինչը հետագայում փոխհատուցվում է ռեցիպիենտի կողմից` սաղմի ներպատվաստման դեպքում:

5. Սույն կարգի 2-րդ կետով նախատեսված դեպքում սաղմի տնօրինումն ստանձնումից հետո Հայաստանի Հանրապետության կառավարության 2013 թվականի օգոստոսի 22-ի N 907-Ն որոշմամբ սահմանված կարգով ծածկագրավորված սաղմի կենսաբանական ծնողների (դոնորների), ռեցիպիենտների, սաղմերի վերաբերյալ ամբողջական տեղեկությունը ներբեռնվում է էլեկտրոնային առողջապահության համակարգ, կենտրոնացված ընթացակարգով, միասնական առողջապահական էլեկտրոնային համակարգի միջոցով:

6. Սաղմի ծածկագիրը կազմված է դոնորների ծածկագրերից` ծածկագրի վերջում ՍՂ տառերի ավելացմամբ, ընդ որում ծածկագրի մեջ առաջինը լրացվում է ձվաբջջի դոնորի ծածկագիրը, այնուհետև սերմնաբջջի դոնորի ծածկագիրը: Երկու նույն դոնորի սեռաբջիջներից ստացված մի քանի սաղմի դեպքում ՍՂ տառերից հետո ավելացվում է թիվ (1-10-ը)` ըստ սաղմերի քանակի:

7. Ռեցիպիենտի ծածկագրավորումը կատարվում է Հայաստանի Հանրապետության կառավարության 2013 թվականի օգոստոսի 22-ի N 907-Ն որոշմամբ դոնորի ծածկագրավորման համար նախատեսված սկզբունքով:

8. Կազմակերպության տնօրինման ներքո գտնվող սաղմերի տրամադրումն իրականացվում է ըստ կազմակերպություն դիմած ռեցիպիենտների հերթագրման: Հերթագրումն իրականացվում է այն բժշկական կազմակերպության կողմից, որին դիմել է շահառուն` ըստ սույն որոշման իմաստով որպես ռեցիպիենտ ճանաչվելու ժամկետի, կենտրոնացված ընթացակարգով, միասնական առողջապահական էլեկտրոնային համակարգի միջոցով:

9. Տվյալ կազմակերպությունում դոնորական սաղմերի բացակայության դեպքում հերթագրված ռեցիպիենտը բժշկական կազմակերպությունների միջև փոխադարձ համաձայնությամբ ուղղորդվում է այն բժշկական կազմակերպություն, որտեղ առկա է սառեցված դոնորական սաղմ:

10. Դոնորական սաղմի անհատույց տրամադրման և այնուհետև ներպատվաստման առաջնահերթությունը տրվում է Հայաստանի Հանրապետության կառավարության 2015 թվականի մայիսի 27-ի N 568-Ն որոշմամբ սահմանված` պետության կողմից երաշխավորված անվճար պայմաններով բժշկական օգնության և սպասարկման իրավունք ունեցող և որպես ռեցիպիենտ հերթագրված զույգերին կամ կնոջը, իսկ վերջիններիս բացակայության դեպքում` ըստ ռեցիպիենտի հերթագրման ժամկետի:

11. Ռեցիպիենտին հնարավորություն է տրվում ընտրություն կատարել կազմակերպությունում առկա դոնորական սաղմերից` ըստ իր նախընտրած չափանիշների (դոնորի տարիք, կրթություն, կենսաչափական տվյալներ, առողջության կարգավիճակ):

12. Ռեցիպիենտի ցանկությամբ կարող է կատարվել սաղմի գենետիկական քննություն, որի արժեքը փոխհատուցվում է ռեցիպիենտի կողմից:

13. Կազմակերպությունում առկա դոնորական սաղմերի ներպատվաստումից ռեցիպիենտի հրաժարվելու դեպքում վերջինիս հերթագրումը չեղարկվում է, սակայն իր դիմումի համաձայն կարող է կատարվել նոր հերթագրում:

14. Նույն դոնորների/դոնորի սեռաբջիջներից ստացված 2 և ավելի սաղմի պարագայում սաղմերը ներպատվաստվում եմ նույն ռեցիպիենտին կամ պահպանվում` հետագայում նույն ռեցիպիենտին ներպատվաստելու նպատակով կամ ռեցիպիենտի կողմից սաղմի հետագա օգտագործման ցանկություն չհայտնելու և պահպանման ծախսերը հոգալուց հրաժարվելու դեպքում` ոչնչացվում:

15. Սաղմի ներպատվաստման դեպքում կազմակերպության և ռեցիպիենտի միջև կնքվող բժշկական ծառայությունների (վճարովի կամ անվճար) մատուցման պայմանագրում նշվում են տեղադրվող սաղմերի քանակը, ծածկագիրը (ծածկագրերը), նոտարական ծառայության հետ կապված ծախսերի` ռեցիպիենտի կողմից փոխհատուցման պայմանը:

Հայաստանի Հանրապետության վարչապետի աշխատակազմի ղեկավար

Ա. Հարությունյան

01.07.2022 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Պաշտոնական հրապարակման օրը՝ 01 հուլիսի 2022 թվական: