ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
Օ Ր Ե Ն Ք Ը
Ընդունված է 2000 թվականի հուլիսի 28-ին
«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԳՈՒՅՔԻ ՄԱՍՆԱՎՈՐԵՑՄԱՆ 1998-2000 ԹՎԱԿԱՆՆԵՐԻ ԾՐԱԳՐԻ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՈՒՄ ԼՐԱՑՈՒՄ ԿԱՏԱՐԵԼՈՒ ԵՎ «ԵՐԵՎԱՆԻ ԷԼԵԿՏՐԱՑԱՆՑ», «ՀՅՈՒՍԻՍԱՅԻՆ ԷԼԵԿՏՐԱՑԱՆՑ», «ՀԱՐԱՎԱՅԻՆ ԷԼԵԿՏՐԱՑԱՆՑ» ԵՎ «ԿԵՆՏՐՈՆԱԿԱՆ ԷԼԵԿՏՐԱՑԱՆՑ» ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅՈՒՆՆԵՐԻ ՄԱՍՆԱՎՈՐԵՑՄԱՆ ՄԱՍԻՆ
|
Հոդված 1. |
ՕՐԵՆՔՈՒՄ ՕԳՏԱԳՈՐԾՎՈՂ ՀԻՄՆԱԿԱՆ ՀԱՍԿԱՑՈՒԹՅՈՒՆՆԵՐԸ |
Սույն օրենքի իմաստով`
էլեկտրաէներգիա բաշխող ընկերությունները` «Երևանի էլեկտրացանց», «Հյուսիսային էլեկտրացանց», «Հարավային էլեկտրացանց» և «Կենտրոնական էլեկտրացանց» փակ բաժնետիրական ընկերություններն են.
ռազմավարական ներդրողը` էլեկտրաէներգիա բաշխող ընկերությունների մասնավորեցման միջազգային մրցույթում հաղթող ճանաչված անձն է, որի հետ Հայաստանի Հանրապետության կառավարության կողմից լիազորված պետական մարմինը կնքում է բաժնետոմսերի առուվաճառքի պայմանագիրը.
բաժնետոմսերի առուվաճառքի պայմանագիրը` էլեկտրաէներգիա բաշխող ընկերությունների բաժնետոմսերի առնվազն 51 տոկոսի միջազգային մրցույթով վաճառքի վերաբերյալ Հայաստանի Հանրապետության կառավարության կողմից լիազորված պետական մարմնի և ռազմավարական ներդրողի միջև կնքվող պայմանագիրն է.
բաժնետոմսերի ուղղակի վաճառքի պայմանագիրը` էլեկտրաէներգիա բաշխող ընկերությունների բաժնետոմսերի` մինչև 20 տոկոսի վաճառքի վերաբերյալ Հայաստանի Հանրապետության կառավարության կողմից լիազորված մարմնի և միջազգային ֆինանսական հաստատության միջև կնքվող պայմանագիրն է.
սակագնային մարժան` էլեկտրաէներգիա բաշխող ընկերությունների կողմից էլեկտրաէներգիայի գնման և սպառողներին դրա վաճառքի գների տարբերությունն է.
էլեկտրաէներգիա բաշխող նոր ընկերությունները` մասնավորեցումից հետո Էլեկտրաէներգիա բաշխող ընկերությունների հիման վրա ձևավորված և սահմանված կարգով էլեկտրաէներգիայի բաշխման համար գործունեության լիցենզիա ստացած առևտրային կազմակերպություններն են.
մրցույթը` էլեկտրաէներգիա բաշխող ընկերությունների մասնավորեցման միջազգային մրցույթն է, որին կարող են մասնակցել Հայաստանի Հանրապետության կառավարության սահմանած կարգով նախնական որակավորում անցած անձինք.
մրցութային հանձնաժողովը` էլեկտրաէներգիա բաշխող ընկերությունների մասնավորեցման գործընթացը կազմակերպող և կարգավորող` Հայաստանի Հանրապետության կառավարության կողմից ստեղծվող հանձնաժողովն է, որի գործունեությունը կանոնակարգվում է Հայաստանի Հանրապետության կառավարության որոշումներով և դրանց համապատասխան` մրցութային հանձնաժողովի որոշումներով.
մրցույթի պայմանները` էլեկտրաէներգիա բաշխող ընկերությունների բաժնետոմսերի մասնավորեցման միջազգային մրցույթի անցկացման վերաբերյալ Հայաստանի Հանրապետության կառավարության կողմից սահմանվող պայմաններն են.
բաշխման գործունեության սակագինը` էլեկտրաէներգիայի բաշխման ցանցերով բաշխման ծառայությունների համար սահմանվող սակագինն է:
|
Հոդված 2. |
ՕՐԵՆՔԻ ԿԱՐԳԱՎՈՐՄԱՆ ԱՌԱՐԿԱՆ |
Սույն օրենքը կարգավորում է էլեկտրաէներգիա բաշխող ընկերությունների մասնավորեցման հետ կապված հարաբերությունները և սահմանում է այդ մասնավորեցման հիմնական սկզբունքներն ու պայմանները:
|
Հոդված 3. |
ԷԼԵԿՏՐԱԷՆԵՐԳԻԱ ԲԱՇԽՈՂ ԸՆԿԵՐՈՒԹՅՈՒՆՆԵՐԻ ՄԱՍՆԱՎՈՐԵՑՄԱՆ ՄԱՍԻՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՍԴՐՈՒԹՅՈՒՆԸ |
Էլեկտրաէներգիա բաշխող ընկերությունների մասնավորեցումը կարգավորվում է սույն օրենքով, «Պետական գույքի մասնավորեցման (սեփականաշնորհման) մասին» Հայաստանի Հանրապետության օրենքով, Հայաստանի Հանրապետության այլ օրենքներով և դրանց համապատասխան ընդունված իրավական ակտերով:
|
Հոդված 4. |
«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԳՈՒՅՔԻ ՄԱՍՆԱՎՈՐԵՑՄԱՆ 1998-2000 ԹՎԱԿԱՆՆԵՐԻ ԾՐԱԳՐԻ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՈՒՄ ԼՐԱՑՈՒՄ ԿԱՏԱՐԵԼՈՒ ՄԱՍԻՆ |
«Հայաստանի Հանրապետության պետական գույքի մասնավորեցման 1998-2000 թվականների ծրագրի մասին» Հայաստանի Հանրապետության օրենքի` 1998-2000 թվականներին մասնավորեցման առաջարկվող պետական ընկերությունների (ձեռնարկությունների) ցանկի «Էներգետիկա» բաժինը լրացնել հետևյալ տողերով`
| «60068 | «Երևանի էլեկտրացանց» փակ բաժնետիրական ընկերություն |
ք. Երևան, Մյասնիկյանի 5/1 |
Մասնավորեցում (միջազգային մրցույթ և ուղղակի վաճառք) |
| 60069 | «Հյուսիսային էլեկտրացանց» փակ բաժնետիրական ընկերություն |
ք. Գյումրի, Շարա Տալյանի 1 |
Մասնավորեցում (միջազգային մրցույթ և ուղղակի վաճառք) |
| 60070 | «Հարավային էլեկտրացանց» փակ բաժնետիրական ընկերություն |
ք. Արտաշատ, Արազու 43 |
Մասնավորեցում (միջազգային մրցույթ և ուղղակի վաճառք) |
| 60071 | «Կենտրոնական էլեկտրացանց» փակ բաժնետիրական ընկերություն |
ք. Աբովյան, Արզնու պողոտա |
Մասնավորեցում (միջազգային) մրցույթ և ուղղակի վաճառք)»: |
| Հոդված 5. | ՄԱՍՆԱՎՈՐԵՑՄԱՆ ՀԻՄՆԱԿԱՆ ՆՊԱՏԱԿՆԵՐԸ |
Էլեկտրաէներգիա բաշխող ընկերությունների մասնավորեցման հիմնական նպատակներն են`
ա) Հայաստանի Հանրապետությունում սահմանված տեխնիկական կանոնակարգերին և գործունեության լիցենզիայի պայմաններին համապատասխան էլեկտրաէներգիայի անխափան և հուսալի շուրջօրյա մատակարարման ապահովումը սպառողներին.
բ) էլեկտրաէներգիա բաշխող ընկերությունների կառավարման արդյունավետության և էլեկտրաէներգիայի բաշխիչ ցանցերի հուսալիության բարձրացումը, էլեկտրաէներգիայի կորուստների առավելագույնս նվազեցումը.
գ) էլեկտրաէներգիայի բաշխիչ ցանցերի վերազինման, ընդլայնման և զարգացման համար ներդրումների ներգրավման ապահովումը.
դ) սպառողներին մատակարարված էլեկտրաէներգիայի դիմաց գումարների գանձման և որպես հետևանք էներգետիկայի բնագավառի ընկերությունների ֆինանսական վիճակի բարելավումը.
ե) Հայաստանի Հանրապետության պետական բյուջեի համալրումը:
| Հոդված 6. | ՄԱՍՆԱՎՈՐԵՑՈՒՄՆ ԻՐԱԿԱՆԱՑՆՈՂ ՄԱՐՄԻՆՆԵՐԸ |
Էլեկտրաէներգիա բաշխող ընկերությունների մասնավորեցումն իրականացնում է Հայաստանի Հանրապետության կառավարությունը` իր կողմից ստեղծված մրցութային հանձնաժողովի և լիազորված պետական մարմինների միջոցով: Մրցութային հանձնաժողովի կազմում իրենց համաձայնությամբ ընդգրկվում են նաև Հայաստանի Հանրապետության Ազգային ժողովի յուրաքանչյուր խմբակցության և խմբի մեկական ներկայացուցիչ: Մրցույթի պայմանները, բաժնետոմսերի առուվաճառքի և ուղղակի վաճառքի պայմանագրերը հաստատում է Հայաստանի Հանրապետության կառավարությունը` սույն օրենքին, Հայաստանի Հանրապետության օրենսդրությանը և դրանց համապատասխան ընդունված այլ իրավական ակտերին համապատասխան: Բաժնետոմսերի առուվաճառքի և ուղղակի վաճառքի պայմանագրերը ստորագրում է (են) Հայաստանի Հանրապետության կառավարության կողմից լիազորված պաշտոնատար անձը (անձինք):
| Հոդված 7. | ԲԱԺՆԵՏՈՄՍԵՐԻ ՕՏԱՐՈՒՄԸ և ՕՏԱՐՄԱՆ ՊԱՅՄԱՆՆԵՐԸ |
Էլեկտրաէներգիա բաշխող ընկերությունների բաժնետոմսերը օտարվում են հետևյալ կարգով և հիմնական պայմաններով.
ա) յուրաքանչյուր փաթեթում ընդգրկված ընկերությունների բաժնետոմսերի առնվազն 51 տոկոսը հավասար չափով վաճառվում է միջազգային մրցույթում հաղթած անձին: Մրցույթին կարող են մասնակցել Հայաստանի Հանրապետության կառավարության սահմանած կարգով նախնական որակավորում անցած անձինք.
բ) յուրաքանչյուր փաթեթում ընդգրկված ընկերությունների բաժնետոմսերի մինչև 20 տոկոսը հավասար չափով կարող է ուղղակի վաճառվել միջազգային ֆինանսական հաստատությանը.
գ) մնացած բաժնետոմսերը հանդիսանում են Հայաստանի Հանրապետության սեփականությունը.
դ) էլեկտրաէներգիա բաշխող նոր ընկերությունների և դրանց բաժնետերերի կողմից էներգետիկայի բնագավառում գործունեության լիցենզիա ունեցող այլ անձանց բաժնետոմսեր, փայամասեր ձեռք բերելը կամ այդ անձանց հետ միավորվելը կարգավորվում է Հայաստանի Հանրապետության էներգետիկայի հանձնաժողովի կողմից` «Էներգետիկայի մասին» Հայաստանի Հանրապետության օրենքով սահմանված կարգով.
ե) ռազմավարական ներդրողն իր սեփականությունը համարվող բաժնետոմսերը կարող է օտարել Հայաստանի Հանրապետության կառավարության համաձայնությամբ.
զ) էլեկտրաէներգիա բաշխող նոր ընկերությունների բաշխման գործունեությամբ պայմանավորված` էլեկտրաէներգիայի գնումը և վաճառքը, էլեկտրաէներգիայի ներկրումը և արտահանումը կարգավորվում են Հայաստանի Հանրապետության էներգետիկայի հանձնաժողովի կողմից` «Էներգետիկայի մասին» Հայաստանի Հանրապետության օրենքով սահմանված կարգով:
| Հոդված 8. | ՄԱՍՆԱՎՈՐԵՑՄԱՆ ՄԻՋԱԶԳԱՅԻՆ ՄՐՑՈՒՅԹԻ ԿԱԶՄԱԿԵՐՊՄԱՆ և ԴՐԱ ԱՐԴՅՈՒՆՔՆԵՐԻ ԳՆԱՀԱՏՄԱՆ ԿԱՐԳԸ |
1. Մրցույթի մասնակիցներն իրենց մրցութային առաջարկները ներկայացնում են մրցութային հանձնաժողով:
2. Մրցութային առաջարկը կազմվում է երկու մասից` տեխնիկական և ֆինանսական:
3. Տեխնիկական առաջարկը պարունակում է մրցույթի մասնակցի և նրա փորձառության մասին տեղեկություններ, մրցույթի պայմանների կատարումը հավաստող փաստաթղթեր, պարտավորագրեր, ներդրումների հիմնական ուղղությունները, ինչպես նաև Հայաստանի Հանրապետության կառավարության կողմից սահմանվող պահանջներին համապատասխան այլ նյութեր ու տեղեկություններ:
4. Ֆինանսական առաջարկը ներառում է բաժնետոմսերի փաթեթի համար առաջարկվող գինը և նախատեսված այլ վճարումների կատարման մասին նամակ-պարտավորագիրը:
5. Մրցութային առաջարկը ներառում է նաև փաստաթղթեր, որոնք հաստատում են մասնակցի պատրաստակամությունը և հիմնավորում նրա ունակությունը` ապահովելու մրցույթի պայմանների, բաժնետոմսերի առուվաճառքի պայմանագրի, գործունեության լիցենզիայի պայմանների և սույն օրենքի, Հայաստանի Հանրապետության օրենսդրության պահանջների կատարումը:
6. Մրցութային առաջարկները (կնքված ծրարները կամ փաթեթները) մրցութային հանձնաժողովի կողմից բացվում են նախապես հայտարարված օրը, ժամին և որոշակի տեղում` կառավարության խորհրդատուների, մամուլի և հեռուստատեսության ներկայացուցիչների, ինչպես նաև մրցույթի մասնակիցների կողմից լիազորված անձանց ներկայությամբ: Մրցութային հանձնաժողովը պարտավոր է առնվազն երկու շաբաթ առաջ նախաորակավորում անցած մրցույթի բոլոր մասնակիցներին ուղարկել հրավեր` մասնակցելու մրցութային առաջարկների բացման արարողությանը: Մրցութային հանձնաժողովը բոլորի համար տեսանելի ձևով ցույց է տալիս և հայտարարում մրցույթի մասնակիցներից յուրաքանչյուրի կողմից առաջարկված բաժնետոմսերի գնման գինը: Մրցութային առաջարկների բացումից և ցուցանիշների հայտարարումից հետո մրցութային հանձնաժողովը նյութերն ուսումնասիրելու, քննարկելու և որոշումներ կայացնելու համար գումարում է նիստ` մրցույթի մասնակիցներին նախօրոք տեղեկացնելով մրցույթի արդյունքների հրապարակային ամփոփման վայրի, օրվա և ժամի մասին:
7. Մրցույթի մասնակիցն առաջարկում է բաժնետոմսերի փաթեթի գնման գինը` ԱՄՆ դոլարով: Մրցույթի հաղթող է ճանաչվում այն մասնակիցը, որի առաջարկը համապատասխանում է մրցույթի պայմաններին, և որը բաժնետոմսերի փաթեթի համար առաջարկում է առավելագույն գին: Եթե մրցույթի երկու կամ ավելի մասնակիցներ առաջարկում են նույն գինը, ապա հաղթողը որոշվում է Հայաստանի Հանրապետության կառավարության կողմից սահմանված կարգով անցկացվող աճուրդով:
8. Մրցութային հանձնաժողովի ներկայացմամբ Հայաստանի Հանրապետության կառավարությունը կարող է ցանկացած պահի որոշում կայացնել մրցույթը դադարեցնելու մասին: Այդ դեպքում մասնավորեցման հետագա ընթացքի մասին Հայաստանի Հանրապետության կառավարությունն ընդունում է համապատասխան որոշում:
| Հոդված 9. | ԷԼԵԿՏՐԱԷՆԵՐԳԻԱ ԲԱՇԽՈՂ ՆՈՐ ԸՆԿԵՐՈՒԹՅՈՒՆՆԵՐԻ ԷԼԵԿՏՐԱԷՆԵՐԳԻԱՅԻ ՍԱԿԱԳՆԱՅԻՆ ՄԱՐԺԱՆ |
1. Էլեկտրաէներգիա բաշխող նոր ընկերությունների կողմից Հայաստանի Հանրապետությունում էլեկտրաէներգիայի գնման, վաճառքի, ինչպես նաև բաշխման գործունեության սակագները կարգավորվում են Հայաստանի Հանրապետության էներգետիկայի հանձնաժողովի կողմից` օրենքով սահմանված կարգով: Էլեկտրաէներգիա բաշխող ընկերությունների մասնավորեցման միջազգային մրցույթում հաղթող ճանաչված ռազմավարական ներդրողների հետ Հայաստանի Հանրապետության էներգետիկայի հանձնաժողովը կնքում է էլեկտրաէներգիայի սակագնային մարժայի համաձայնագիր: Սակագնային մարժայի համաձայնագրում մինչև 2004 թվականն ընկած ժամանակահատվածի համար ֆիքսվում է ԱՄՆ արժույթով արտահայտված գործող մարժան չգերազանցող անփոփոխ սակագնային մարժան և ներկայացվում է հետագա տարիների համար սակագնային մարժայի հաշվարկման բանաձևը` կախված իրականացված ներդրումային ծրագրից, սղաճից, դրամի և ԱՄՆ դոլարի փոխարժեքից, էլեկտրաէներգիայի առաջարկի և պահանջարկի փոփոխությունից:
2. Ռազմավարական ներդրողի հետ կնքված սակագնային մարժայի համաձայնագրի հիմնական դրույթներն ամրագրվում են նաև ընկերության գործունեության լիցենզիայում` որպես էլեկտրաէներգիա բաշխող նոր ընկերությունների համար բաշխման գործունեության լիցենզիայի պայմաններ:
| Հոդված 10. | ԷԼԵԿՏՐԱԷՆԵՐԳԻԱ ԲԱՇԽՈՂ ԸՆԿԵՐՈՒԹՅՈՒՆՆԵՐԻ ԴԵԲԻՏՈՐԱԿԱՆ և ԿՐԵԴԻՏՈՐԱԿԱՆ ՊԱՐՏՔԵՐԻ ԿԱՐԳԱՎՈՐՈՒՄԸ |
1. Էլեկտրաէներգիա բաշխող ընկերությունների կրեդիտորական պարտքերից աշխատավարձը և դրան հավասարեցված վճարումները, սոցիալական ապահովագրության և ապահովության վճարները, սպառողների կողմից էլեկտրաէներգիայի դիմաց կատարված կանխավճարները, վարկային և բյուջեի հանդեպ պարտավորությունները փոխանցվում են էլեկտրաէներգիա բաշխող նոր ընկերություններին:
2. Էլեկտրաէներգիա բաշխող ընկերությունների մնացած կրեդիտորական և դեբիտորական պարտքերը փոխանցվում են էներգահամակարգի այլ ընկերությունների:
| Հոդված 11. | ԷԼԵԿՏՐԱԷՆԵՐԳԻԱ ԲԱՇԽՈՂ ԸՆԿԵՐՈՒԹՅՈՒՆՆԵՐԻ ԽՄԲԱՎՈՐՈՒՄԸ ԲԱԺՆԵՏՈՄՍԵՐԻ ՎԱՃԱՌՔԻ ԵՐԿՈՒ ՓԱԹԵԹՈՒՄ |
1. Մասնավորեցման նպատակով էլեկտրաէներգիա բաշխող ընկերությունների բաժնետոմսերը խմբավորվում են վաճառքի հետևյալ երկու փաթեթում`
ա) առաջին փաթեթ` «Երևանի էլեկտրացանց» և «Հյուսիսային էլեկտրացանց» փակ բաժնետիրական ընկերությունների բաժնետոմսերը.
բ) երկրորդ փաթեթ` «Հարավային էլեկտրացանց» և «Կենտրոնական էլեկտրացանց» փակ բաժնետիրական ընկերությունների բաժնետոմսերը:
2. Մրցույթի յուրաքանչյուր մասնակից կարող է ձեռք բերել ընկերությունների բաժնետոմսերի միայն մեկ փաթեթ:
| Հոդված 12. | ԷԼԵԿՏՐԱԷՆԵՐԳԻԱ ԲԱՇԽՈՂ ՆՈՐ ԸՆԿԵՐՈՒԹՅՈՒՆՆԵՐԻ ՆԵՐԴՐՈՒՄԱՅԻՆ ԾՐԱԳՐԵՐԸ |
1. Ռազմավարական ներդրողը պարտավոր է էլեկտրաէներգիա բաշխող նոր ընկերության անունից ապահովել անհրաժեշտ միջոցների ներգրավում ներդրումային ծրագրերի իրականացման համար: Ներդրումային ծրագրերը պետք է ապահովեն տեխնիկական կանոնակարգերի և գործունեության լիցենզիայի պայմաններին համապատասխան սպառողներին էլեկտրաէներգիայի անխափան և հուսալի մատակարարման պահանջների բավարարումը: Ներդրումային ծրագրերի իրականացման համար անհրաժեշտ միջոցների ներգրավումը չի բերում էլեկտրաէներգիա բաշխող նոր ընկերությունների բաժնետերերի բաժնեմասերի փոփոխության:
2. Ռազմավարական ներդրողը պարտավոր է էլեկտրաէներգիա բաշխող նոր ընկերության կողմից նոր սարքերի, սարքավորումների և ապրանքների ձեռքբերման և ծառայությունների մատուցման նախապատվությունը տալ տեղական արտադրողներին կամ ծառայություններ մատուցող տեղական կազմակերպություններին (կատարողներին):
| Հոդված 13. | ՖԻՆԱՆՍԱՏՆՏԵՍԱԿԱՆ ՀԱՐԱԲԵՐՈՒԹՅՈՒՆՆԵՐԻ ԿԱՐԳԱՎՈՐՈՒՄԸ |
Ռազմավարական ներդրողը պարտավոր է առուվաճառքի պայմանագրերում ամրագրված ժամկետներում ապահովել ստացած էլեկտրաէներգիայի (հզորության), մատուցած ծառայությունների և կատարած աշխատանքների դիմաց էլեկտրաէներգիա բաշխող նոր ընկերությունների կողմից 100 տոկոս վճարումները:
| Հոդված 14. | ԱՌԱՎԵԼ ԿԱՐևՈՐ ՆՇԱՆԱԿՈՒԹՅԱՆ ՍՊԱՌՈՂՆԵՐԻ ԷՆԵՐԳԱՄԱՏԱԿԱՐԱՐՄԱՆ ԵՐԱՇԽԻՔՆԵՐԸ |
Հայաստանի Հանրապետության կառավարության երաշխիքներով էլեկտրաէներգիայի անընդհատ և անխափան մատակարարում պահանջող առավել կարևոր նշանակության սպառողների ցանկը յուրաքանչյուր տարի ներառվում է Հայաստանի Հանրապետության պետական բյուջեի մասին օրենքում:
| Հոդված 15. | ԱՐՏԱԿԱՐԳ ԻՐԱՎԻՃԱԿՆԵՐՈՒՄ ԷԼԵԿՏՐԱԷՆԵՐԳԻԱՅԻ ՄԱՏԱԿԱՐԱՐՄԱՆ ՊԱՀԱՆՋՆԵՐԸ |
1. Հայաստանի Հանրապետության օրենքներով սահմանված դեպքերում և կարգով Հայաստանի Հանրապետության կառավարությունը իրավասու է անհրաժեշտ գործողություններ ձեռնարկել` հայտարարված արտակարգ իրավիճակներում էներգետիկայի բնագավառի գործունեության կանոնակարգման համար:
2. Էլեկտրաէներգիա բաշխող նոր ընկերությունները Հայաստանի Հանրապետության էներգետիկայի հանձնաժողովի կողմից սահմանված կարգով նախապատրաստում են էլեկտրաէներգիայի մատակարարման անխուսափելի սահմանափակումների հանգեցնող իրավիճակների հաղթահարման գործողությունների ծրագրեր, որոնց նկատմամբ պահանջներն ամրագրվում են գործունեության լիցենզիաներում: Այդ ծրագրերը ներառում են էներգամատակարարման առաջնահերթության սպառողների ցանկը, որը յուրաքանչյուր հաջորդ տարվա համար մինչև ընթացիկ տարվա հոկտեմբերի 1-ը սահմանվում է Հայաստանի Հանրապետության կառավարության կողմից:
3. Էներգամատակարարման անխուսափելի սահմանափակումներ պահանջող իրավիճակներում էլեկտրաէներգիա բաշխող նոր ընկերությունները պարտավոր են ճշտությամբ հետևել և կատարել հաստատված ծրագրերում նշված միջոցառումները և բոլոր սպառողներին տեղեկացնել էներգիայի մատակարարման սահմանափակումների չափերի և տևողության մասին:
| Հոդված 16. | ԷԼԵԿՏՐԱԷՆԵՐԳԻԱ ԲԱՇԽՈՂ ԸՆԿԵՐՈՒԹՅՈՒՆՆԵՐԻ ՀԱՐԿԱՅԻՆ ՊԱՐՏԱՎՈՐՈՒԹՅՈՒՆՆԵՐԻ ԿԱՐԳԱՎՈՐՈՒՄԸ |
1. Մասնավորեցվող էլեկտրաէներգիա բաշխող ընկերություններն ազատվում են մասնավորեցման պահին նախորդող ժամանակաշրջանի գործունեության հետևանքով առաջացած հարկային պարտավորություններից, որոնք կհայտնաբերվեն կամ կարձանագրվեն մասնավորեցումից հետո:
2. Սույն օրենքի 10 հոդվածի համաձայն` Հայաստանի Հանրապետության կառավարության կողմից սահմանված կարգով դեբիտորական և կրեդիտորական պարտքերի վերակառուցման հետևանքով իրականացվող գործարքի մասով Հայաստանի Հանրապետության էներգահամակարգի ընկերություններն ազատվում են առաջացող լրացուցիչ շահութահարկից և ավելացված արժեքի հարկից:
| Հոդված 17. | ՕՐԵՆՔԻ ՈՒԺԻ ՄԵՋ ՄՏՆԵԼԸ |
Սույն օրենքն ուժի մեջ է մտնում պաշտոնական հրապարակման պահից:
|
Հայաստանի Հանրապետության |
Ռ. Քոչարյան |
|
|