ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ

ՎԻՃԱԿԱԳՐՈՒԹՅԱՆ ՊԵՏԱԿԱՆ ԽՈՐՀՈՒՐԴ

Ո Ր Ո Շ ՈՒ Մ

 «ՀՈՂԵՐԻ ԲԱՐԵԼԱՎՄԱՆ ՄԱՍԻՆ» ՁԵՎ 1-ՀՈՂԱՅԻՆ ՊԱՇԱՐՆԵՐ (ՏԱՐԵԿԱՆ) ՎԻՃԱԿԱԳՐԱԿԱՆ ԱՄՓՈՓ ՀԱՇՎԵՏՎՈՒԹՅԱՆ ՁԵՎԸ ԵՎ ԼՐԱՑՄԱՆ ՀՐԱՀԱՆԳԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԻՃԱԿԱԳՐՈՒԹՅԱՆ ՊԵՏԱԿԱՆ ԽՈՐՀՐԴԻ 2001 ԹՎԱԿԱՆԻ ՆՈՅԵՄԲԵՐԻ 20-Ի ԹԻՎ 98 ՈՐՈՇՈՒՄՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

Ղեկավարվելով «Պաշտոնական վիճակագրության մասին» օրենքի 10-րդ հոդվածի 3-րդ մասի 1-ին կետի և 18-րդ հոդվածի 4-րդ մասի, ինչպես նաև «Նորմատիվ իրավական ակտերի մասին» օրենքի 37-րդ հոդվածի 1-ին մասի դրույթներով՝ Հայաստանի Հանրապետության վիճակագրության պետական խորհուրդը որոշում է.

1. Հաստատել «Հողերի բարելավման մասին» Ձև 1-ՀՈՂԱՅԻՆ ՊԱՇԱՐՆԵՐ (տարեկան) վիճակագրական ամփոփ հաշվետվության ձևը՝ համաձայն հավելված 1-ի:

2. Հաստատել «Հողերի բարելավման մասին» Ձև 1-ՀՈՂԱՅԻՆ ՊԱՇԱՐՆԵՐ (տարեկան) վիճակագրական ամփոփ հաշվետվության ձևի լրացման հրահանգը՝ համաձայն հավելված 2-ի:

3. Ուժը կորցրած ճանաչել Հայաստանի Հանրապետության վիճակագրության պետական խորհրդի 2001 թվականի նոյեմբերի 20-ի ««Հողերի բարելավման մասին» ձև թիվ 1-հողային պաշարներ ամփոփ պետական վիճակագրական հաշվետվության ձևը և լրացման հրահանգը հաստատելու մասին» թիվ 98 որոշումը:

4. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Նախագահ`

Ս. Մնացականյան

Հավելված 1 Հայաստանի Հանրապետության վիճակագրության պետական խորհրդի 2019 թվականի դեկտեմբերի 27 -ի թիվ 57-Ն որոշման

Բաժին 1. Բարելավման կարիք ունեցող հողերի բաշխվածությունն ըստ դրանց նպատակային նշանակության

հեկտար

Բաժին 2. Հողերի պահպանության և վերականգնման միջոցառումներ

Նշումներ՝

Ղեկավար՝	_______________________________ (Ազգանուն, անուն)	_______________________________ (Ստորագրություն)
Լրացնող	_______________________________ (Ազգանուն, անուն)	_______________________________ (Ստորագրություն)
		« ___ »________20___թ.

Հավելված 2 Հայաստանի Հանրապետության վիճակագրության պետական խորհրդի 2019 թվականի դեկտեմբերի 27-ի թիվ 57-Ն որոշման

 Հ Ր Ա Հ Ա Ն Գ

«ՀՈՂԵՐԻ ԲԱՐԵԼԱՎՄԱՆ ՄԱՍԻՆ» ՁԵՎ 1-ՀՈՂԱՅԻՆ ՊԱՇԱՐՆԵՐ (ՏԱՐԵԿԱՆ) ՎԻՃԱԿԱԳՐԱԿԱՆ ՀԱՇՎԵՏՎՈՒԹՅԱՆ ԼՐԱՑՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն հրահանգը կարգավորում է «Հողերի բարելավման մասին» Ձև 1-ՀՈՂԱՅԻՆ ՊԱՇԱՐՆԵՐ (տարեկան) վիճակագրական ամփոփ հաշվետվության (այսուհետ` Հաշվետվություն) լրացման կարգի հետ կապված հարաբերությունները:

2. Հաշվետվությունը ներկայացնում են ՀՀ մարզպետարանները և Երևանի քաղաքապետարանը, որոնք այդ մասին իրազեկվում են Հայաստանի Հանրապետության վիճակագրության պետական խորհրդի 2016 թվականի հունիսի 20-ի թիվ 05-Ն որոշմամբ հաստատված կարգի դրույթներին համապատասխան:

3. Հաշվետվության ցուցանիշները լրացվում են հաշվետու տարվա համար և ներկայացվում են մինչև հաշվետու ժամանակաշրջանին հաջորդող տարվա փետրվարի 25-ը:

4. Հաշվետվության դիմային էջի «Փաստացի գործունեության հիմնական տեսակի» ծածկագիրը լրացվում է՝ համաձայն «Տնտեսական գործունեության տեսակների դասակարգչի» 5-նիշ խմբավորման (տես՝ http://www.arlis.am/Annexes/4/GT30.1-13page1730-2124ink1392.doc հղումը):

5. Վիճակագրական տվյալների ներկայացման հետ կապված հարաբերությունները կարգավորվում են ՀՀ օրենսդրությամբ:

II. ԲԱՐԵԼԱՎՄԱՆ ԿԱՐԻՔ ՈՒՆԵՑՈՂ ՀՈՂԵՐԻ ԲԱՇԽՎԱԾՈՒԹՅՈՒՆՆ ԸՍՏ ԴՐԱՆՑ ՆՊԱՏԱԿԱՅԻՆ ՆՇԱՆԱԿՈՒԹՅԱՆ

6. Գյուղատնտեսական նշանակության հողերը` գյուղատնտեսական կարիքների համար առանձնացված և գյուղատնտեսական գործունեություն ծավալելու նպատակով գյուղատնտեսական մշակաբույսերի մշակման, բազմամյա տնկարկների հիմնման, խոտհնձի, անասունների արածեցման, ինչպես նաև գյուղատնտեսական այլ նպատակների համար նախատեսված հողատեսքեր են (տող 1 = տող 1.1 + տող 1.2 + տող 1.3 + տող 1.4 + տող 1.5):

7. Հատուկ պահպանվող տարածքների հողերը` գեղագիտական, բնապահպանական, գիտական, պատմական և մշակութային, հանգստյան, առողջարարական և այլ արժեքավոր նշանակություն ունեցող հողամասերն են, որոնց համար սահմանված է հատուկ իրավական ռեժիմ (տող 3 = տող 3.1 + տող 3.2 + տող 3.3 + տող 3.4):

8. Անտառային հողերը` անտառապատ, կենդանական և բուսական աշխարհի պահպանման, ինչպես նաև անտառով չծածկված, բայց անտառային տնտեսության կարիքների համար նախատեսված հողերն են (տող 4 = տող 4.1 + տող 4.2 + տող 4.3 + տող 4.4 + տող 4.5):

9. Ջրային հողեր` ջրային օբյեկտներով` գետերով, բնական և արհեստական ջրամբարներով, լճերով զբաղեցրած, ինչպես նաև ջրային օբյեկտների օգտագործման և պահպանության համար անհրաժեշտ հիդրոտեխնիկական, ջրատնտեսային և այլ օբյեկտների համար առանձնացված տարածքներն են:

10. Պահուստային հողեր` համայնքներին, քաղաքացիներին և իրավաբանական անձանց սեփականության, օգտագործման իրավունքով չտրամադրված պետական հողեր, ինչպես նաև օրենսդրությամբ սահմանված կարգով կոնսերվացիայի արդյունքում տնտեսական շրջանառությունից հանված հողամասերն են:

11. Հողատարված քամուց՝ այն հողերն են, որոնք քայքայվում են քամու ազդեցության ներքո (հողմային էրոզիա-դեֆլյացիա):

12. Հողատարված ջրից՝ այն հողերն են, որոնք քայքայվում են ջրի ազդեցության ներքո (ջրային էրոզիա):

13. Աղակալված՝ այն հողերն են, որոնք իրենց պրոֆիլում պարունակում են գյուղատնտեսական մշակաբույսերի համար թունավոր քանակությամբ հեշտ լուծվող աղեր (աղուտներ, աղակալված հողեր, ալկալիներ):

14. Երկրորդային աղակալված՝ այն հողերն են, որտեղ գյուղատնտեսական մշակաբույսերի համար վնասակար աղերի կուտակման գործընթացը պայմանավորված է մարդու սխալ տնտեսական գործունեությամբ (ջրման տեխնիկա, ռեժիմների խախտման արդյունքում գետնաջրերի մակարդակի բարձրացում, ոռոգում հանքայնացված ջրերով և այլն):

15. Ալկալիացված՝ այն հողերն են, որոնք կլանված վիճակում պարունակում են մեծ քանակությամբ փոխանակային նատրիում (երբեմն նաև մագնեզիում) իլյուվիալ հորիզոնում:

16. Խախտված՝ ընդերքի հանույթների հետևանքով (քարհանքեր, օգտակար հանածոների բաց հանքեր և այլն) վնասված հողատարածություններն են, ինչպես նաև, հողատարածքներն են, որոնք ծածկված են արդյունաբերական թափոններով, լեռնաքիմիական արտադրության լիցքերով և այլն: Սրանք շահագործումից դուրս եկած և ռեկուլտիվացիայի չենթարկված հողեր են:

17. Գերխոնավացած՝ այն հողերն են, որոնք ամբողջությամբ հագեցած են ջրով:

18. Քարքարոտ՝ այն հողերն են, որոնք իրենց պրոֆիլում պարունակում են տարբեր մեծության և ձևի քարեր:

19. Թափոններով աղտոտված՝ այն հողերն (տարածքներն) են, որոնք աղտոտված են տարբեր աղտոտիչներով (արդյունաբերական, շինարարական, կենցաղային և այլն):

20. Ճահճացած՝ այն հողերն են, որոնք առաջացել են մակերեսային կամ գրունտային ջրերի ավելցուկային խոնավության պայմաններում հատուկ խոնավասեր (ճահճային) բուսականության ազդեցության ներքո:

21. Անապատացված՝ այն հողերն են, որտեղ ի հայտ են գալիս անապատային լանդշաֆտներին բնորոշ հատկություններ (ցուցանիշներ): Անապատացումը հողերի (տարածքների) դեգրադացիան է:

22. Սյունակ 1-ում լրացվում է ըստ նպատակային նշանակության հողերի զբաղեցրած ընդհանուր տարածքները (Կադաստրի կոմիտեի հողային հաշվեկշռային ցուցանիշները):

23. Սյունակ 2-ում լրացվում է բարելավման կարիք ունեցող սյունակներ 3-14-ում նշված հողերի հանրագումարը՝ սյունակ 2 = սյունակ 3 + սյունակ 4 + սյունակ 5 + սյունակ 6 + սյունակ 7 + սյունակ 8 + սյունակ 9 + սյունակ 10 + սյունակ 11 + սյունակ 12 + սյունակ 13 + սյունակ 14:

24. Տող 7-ը հանդիսանում է գյուղատնտեսական նշանակության, հատուկ պահպանվող տարածքների, անտառային, ջրային և պահուստային հողերի հանրագումարը՝ տող 7 = տող 1 + տող 3 + տող 4 + տող 5 + տող 6:

III. ՀՈՂԵՐԻ ՊԱՀՊԱՆՈՒԹՅԱՆ ԵՎ ՎԵՐԱԿԱՆԳՆՄԱՆ ՄԻՋՈՑԱՌՈՒՄՆԵՐ

25. Սյունակ 1-ի տողեր 1.1 - 1.8-ում լրացվում են հողերի այն տարածքները, որոնց պահպանման համար կատարվել են համապատասխան ագրոտեխնիկական և հիդրոտեխնիկական միջոցառումներ:

26. Սյունակ 1-ի տողեր 2.1.1-ում և 2.1.2-ում լրացվում են մեկ հեկտարի հաշվով օգտագործվող համապատասխանաբար օրգանական և հանքային պարարտանյութերի քանակները, իսկ տող 2.2-ում` մեկ հեկտարի հաշվով օգտագործվող թունաքիմիկատների և պեստիցիդների քանակները:

27. Սյունակ 1-ի տողեր 3.1 - 3.8-ում լրացվում են հողերի պահպանության և արդյունավետ օգտագործման համար կատարված համապատասխան ծախսերը: