ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

25 ապրիլի 2019 թվականի N 560-Լ

ՀԱՅԱՍՏԱՆԻ ԳՈՐԾԱՐԱՐ ՄԻՋԱՎԱՅՐԻ ԲԱՐԵԼԱՎՄԱՆ 2019 ԹՎԱԿԱՆԻ ՄԻՋՈՑԱՌՈՒՄՆԵՐԻ ԾՐԱԳՐԻՆ ՀԱՎԱՆՈՒԹՅՈՒՆ ՏԱԼՈՒ ՄԱՍԻՆ

Հիմք ընդունելով Հայաստանի Հանրապետության Սահմանադրության 146-րդ հոդվածը և Հայաստանի Հանրապետության կառավարության 2018 թվականի հունիսի 8-ի N 667-Լ որոշումը՝ Հայաստանի Հանրապետության կառավարությունը որոշում է.

1. Հավանություն տալ Հայաստանի գործարար միջավայրի բարելավման 2019 թվականի միջոցառումների ծրագրին` համաձայն հավելվածի:

2. Հայաստանի Հանրապետության պետական կառավարման համակարգի մարմինների ղեկավարներին՝ ապահովել, իսկ միջոցառումների կատարման համար պատասխանատու հանդիսացող այլ մարմիններին առաջարկել, որ մինչև յուրաքանչյուր ամսվա 5-րդ աշխատանքային օրը միջոցառման համար պատասխանատու մարմինը Հայաստանի Հանրապետության տնտեսական զարգացման և ներդրումների նախարարություն ներկայացնի տեղեկատվություն Հայաստանի գործարար միջավայրի բարելավման 2019 թվականի միջոցառումների ծրագրում ընդգրկված միջոցառումների կատարման ընթացքի մասին՝ բացառությամբ այն միջոցառումների, որոնց պատասխանատու մարմինը Հայաստանի Հանրապետության տնտեսական զարգացման և ներդրումների նախարարությունն է: Տեղեկատվության մեջ պետք է մանրամասն արտացոլվեն իրականացված կամ իրականացվող միջոցառումները և դրանց ազդեցությունը, մասնավորապես, միջոցառման կատարման արդյունքում ընթացակարգերի, դրանց ժամկետների և (կամ) ծախսի կրճատման վրա:

3. Հայաստանի Հանրապետության տնտեսական զարգացման և ներդրումների նախարարին՝ ամփոփել ներկայացված տեղեկատվությունը և մինչև յուրաքանչյուր ամսվա 10-րդ աշխատանքային օրը կատարված աշխատանքների ընթացքի մասին հաշվետվություն ներկայացնել Հայաստանի Հանրապետության վարչապետի աշխատակազմ:

4. Սույն որոշումն ուժի մեջ է մտնում պաշտոնական հրապարակմանը հաջորդող օրը։

Հայաստանի Հանրապետության վարչապետ	Ն. Փաշինյան
2019 թ. մայիսի 20 Երևան

Հավելված ՀՀ կառավարության 2019 թվականի ապրիլի 25-ի N 560-Լ որոշման

ծ ր ա գ ի ր

Հայաստանի գործարար միջավայրի բարելավման 2019 թվականի միջոցառումների

	Առաջարկվող միջոցառումը	Նպատակը	Պատասխանատու մարմինը	Կատարման ժամկետը	Միջոցառման իրականացման համար պահանջվող գումարի աղբյուրը
1	2	3	4	5	6
1. Ընկերությունների հիմնում
1)	Իրավաբանական անձանց պետական գրանցման (այդ թվում՝ նաև ոչ տիպային կանոնադրության հիման վրա) գործընթացի, ինչպես նաև կանոնադրության ցանկացած փոփոխության էլեկտրոնային եղանակով իրականացման հնարավորության ստեղծում	իրավաբանական անձանց պետական գրանցման գործընթացի մատչելիության և հասանելիության ապահովում	ՀՀ արդարադատության նախարարություն	20.06.2019 թ.	Ֆինանսավորում չի պահանջվում:
2)	Հարկային, վարձու աշխատողների, անշարժ գույքի կադաստրի, պետական գնումների և գրավի տվյալների բազաների միավորում և (կամ) հասանելիության ապահովում՝ ՀՀ պետական կառավարման մարմինների համար	ընկերությունների գրանցման պետական ռեեստրի կատարելագործում	ՀՀ արդարադատության նախարարություն ՀՀ աշխատանքի և սոցիալական հարցերի նախարարություն ՀՀ ֆինանսների նախարարություն ՀՀ պետական եկամուտների կոմիտե ՀՀ անշարժ գույքի կադաստրի կոմիտե	20.06.2019 թ.
3)	Պետական ծառայությունների մատուցման միասնական գրասենյակների գործառույթների ընդլայնում՝ ներառելով լիցենզիաների և թույլտվությունների ստացման գործընթացները։ Համապատասխան օրենսդրական փոփոխությունների նախաձեռնում	տնտեսավարողների կողմից փաստաթղթերի ներկայացման և ստացման մատչելիության ապահովում և քայլերի կրճատում	ՀՀ արդարադատության նախարարություն ՀՀ պետական կառավարման մարմիններ	20.06.2019 թ․
2. Շինարարական թույլտվություններ
1)	Ցածր, միջին և միջինից բարձր ռիսկայնության աստիճանի շինությունների համար ավարտական ակտի ստացման գործընթացի պարզեցում և ժամկետների կրճատում	կառուցապատման ընթացակարգերի պարզեցում և ժամկետների կրճատում	ՀՀ քաղաքաշինության կոմիտե ՀՀ տարածքային կառավարման և զարգացման նախարարություն Երևանի քաղաքապետարան (համաձայնությամբ)	30. 06. 2019 թ.	Ֆինանսավորում չի պահանջվում:
2)	Ցածր, միջին և միջինից բարձր ռիսկայնության աստիճանի շինությունների համար ավարտական ակտի ստացման համար հանձնաժողովի ձևավորման լիազորությունը կառուցապատողից վերապահել ՏԻՄ-ին	կառուցապատման ընթացակարգերի պարզեցում և ժամկետների կրճատում	ՀՀ տնտեսական զարգացման և ներդրումների նախարարություն ՀՀ քաղաքաշինության կոմիտե ՀՀ տարածքային կառավարման և զարգացման նախարարություն Երևանի քաղաքապետարան (համաձայնությամբ)	30. 07.2019 թ.	Ֆինանսավորում չի պահանջվում:
3)	Հայաստանի Հանրապետության կառավարության 2015 թվականի մարտի 19-ի N 596-Ն որոշման մեջ փոփոխություն կատարելու վերաբերյալ նախագծի` ՀՀ վարչապետի աշխատակազմ ներկայացում	կառուցապատման պարզ և հստակ ընթացակարգի սահմանում, էլեկտրոնային e-permits գործիքի կիրառման շրջանակների ընդլայնում, առկա խնդիրների կանոնակարգում	ՀՀ քաղաքաշինության կոմիտե ՀՀ տնտեսական զարգացման և ներդրումների նախարարություն ՀՀ տարածքային կառավարման և զարգացման նախարարություն Երևանի քաղաքապետարան (համաձայնությամբ) ՀՀ հանրային ծառայությունները կարգավորող հանձնաժողով (համաձայնությամբ)	30. 07.2019 թ.	Ֆինանսավորում չի պահանջվում:
4)	Շինարարության թույլտվությունների տրամադրման էլեկտրոնային e-permits համակարգի արդիականացում և ինտեգրում՝ մատակարար կազմակերպությունների և տեղական ինքնակառավարման ու կառուցապատման ընթացակարգերին մասնակից այլ մարմինների ներքին էլեկտրոնային համակարգերի հետ	կառուցապատման ընթացակարգերին մասնակից բոլոր մարմինների և կազմակերպությունների հետ ինտեգրված միասնական էլեկտրոնային e-permits համակարգ, որը կծառայի որպես էլեկտրոնային միասնական հարթակ	ՀՀ քաղաքաշինության կոմիտե ՀՀ տարածքային կառավարման և զարգացման նախարարություն Երևանի քաղաքապետարան (համաձայնությամբ)	30.12.2019 թ.	30 000.0 հազ. դրամ (մատակարար կազմակերպություններ)
5)	«Էլեկտրական էներգիայի մատակարարման և օգտագործման կանոնները հաստատելու մասին», «Բնական գազի մատակարարման և օգտագործման կանոնները հաստատելու մասին» և «Խմելու ջրի մատակարարման և ջրահեռացման (կեղտաջրերի մաքրման) ծառայությունների մատուցման կանոնները հաստատելու մասին» ՀՀ հանրային ծառայությունները կարգավորող հանձնաժողովի որոշումներում համապատասխան փոփոխությունների կատարում	«Էլեկտրական էներգիայի մատակարարման և օգտագործման», «Բնական գազի մատակարարման և օգտագործման» և «Խմելու ջրի մատակարարման և ջրահեռացման (կեղտաջրերի մաքրման) ծառայությունների մատուցման» կանոնները հաստատելու մասին» ՀՀ հանրային ծառայությունները կարգավորող հանձնաժողովի որոշումների համապատասխանեցում ՀՀ կառավարության 2015 թվականի մարտի 19-ի N 596-Ն որոշման դրույթներին	ՀՀ հանրային ծառայությունները կարգավորող հանձնաժողով (համաձայնությամբ)	2-րդ բաժնի 2-րդ ենթակետով նախատեսված որոշման ընդունումից հետո՝ 6-շաբաթյա ժամկետում	Ֆինանսավորում չի պահանջվում:
6)	Սահմանել մեխանիզմ, ըստ որի ավարտական ակտը հաստատվելուց հետո անմիջապես ՏԻՄ-ի կողմից այն ներկայացվի ՀՀ անշարժ գույքի կադաստրի կոմիտե սեփականության գրանցման համար՝ առանց կառուցապատողի կողմից վերջինիս դիմելու	շինարարական թույլտվության տրամադրման գործընթացում անհրաժեշտ քայլերի կրճատում	ՀՀ քաղաքաշինության կոմիտե ՀՀ անշարժ գույքի կադաստրի կոմիտե Երևանի քաղաքապետարան (համաձայնությամբ)	30.09.2019 թ.	Ֆինանսավորում չի պահանջվում:
7)	Համայնքներում կառուցապատման նախագծերի համապատասխանությունն ուսումնասիրելու նպատակով ներգրավված ինժեներների (ճարտարապետների) համար պարտադիր նվազագույն պահանջների ներդրման հարցի դիտարկում	շինարարական աշխատանքների որակի բարելավում	ՀՀ քաղաքաշինության կոմիտե ՀՀ տարածքային կառավարման և զարգացման նախարարություն Երևանի քաղաքապետարան (համաձայնությամբ)	30.06.2019թ.	Ֆինանսավորում չի պահանջվում:
8)	GIS համակարգի ներդնում՝ ապահովելով մատակարարների և համաձայնություն պահանջող այլ կազմակերպությունների ու պետական մարմինների հասանելիությունն այդ համակարգին	ճարտարապետահատակագծային առաջադրանքի տրամադրման գործընթացում անհրաժեշտ քայլերի ու ժամկետի կրճատում և վարչարարության նվազեցում	ՀՀ անշարժ գույքի կադաստրի կոմիտե ՀՀ քաղաքաշինության պետական կոմիտե Երևանի քաղաքապետարան (համաձայնությամբ)	ՀՀ անշարժ գույքի կադաստրի կոմիտեի հնգամյա ծրագրով նախատեսված ինտեգրված (միասնական) կադաստրի ստեղծման միջոցառման ժամանակացույցին համապատասխան	Ֆինանսավորում չի պահանջվում:
9)	Ցածր ռիսկայնության օբյեկտների կառուցապատման համար պահանջվող ընթացակարգերի և պահանջների պարզեցում	կառուցապատման համար պահանջվող թույլտվական ընթացակարգերի ժամկետների և քայլերի կրճատում	ՀՀ քաղաքաշինության կոմիտե ՀՀ տարածքային կառավարման և զարգացման նախարարություն Երևանի քաղաքապետարան (համաձայնությամբ)	30.06.2019 թ.	Ֆինանսավորում չի պահանջվում:
3. Էլեկտրաէներգիայի մատակարարման ցանցին միացում
1)	Միացման ժամկետների կրճատում 5 օրով	մատուցված ծառայությունների որակի բարելավում	ՀՀ հանրային ծառայությունները կարգավորող հանձնաժողով (համաձայնությամբ) ՀՀ տարածքային կառավարման և զարգացման նախարարություն «Հայաստանի էլեկտրական ցանցեր» ՓԲԸ (համաձայնությամբ)	15.06. 2019 թ.	Ֆինանսավորում չի պահանջվում:
2)	Միացման քայլերի և ժամկետների մասին շնորհանդեսի իրականացում՝ շահառուներին իրազեկելու նպատակով	շահառուների իրազեկում՝ միացման քայլերի (մինչև 2) և ժամկետների կրճատման մասին	«Հայաստանի էլեկտրական ցանցեր» ՓԲԸ (համաձայնությամբ)	Մինչև 15. 06. 2019 թ.	Ֆինանսավորում չի պահանջվում:
4. Սեփականության գրանցում
1)	Նոտարական վավերացում չպահանջող անշարժ գույքին առնչվող պայմանագրերի օրինակելի ձևերի ընդլայնում, ինչպես նաև ներկայացվող որոշ պարտադիր պայմանների (ֆիզիկական անձ հանդիսացող կողմը չի կարող հանդես գալ լիազորագրի հիման վրա) վերացում	հնարավորություն ընձեռնել ավելի լայն զանգվածին օգտվելու նոտարական վավերացում չպահանջող պայմանագրերի կնքումից	ՀՀ անշարժ գույքի կադաստրի կոմիտե	30.11.2019 թ.	Ֆինանսավորում չի պահանջվում:
2)	ՀՀ անշարժ գույքի կադաստրի կոմիտեի կայքէջի միջոցով առցանց տրամադրվող տեղեկությունների տեսակների ընդլայնում (պայմանագրային գներ), նոր տեղեկատվական փաթեթների մշակում և այդ տեղեկությունների համար նախատեսված վճարների մոտ երկու անգամ նվազեցում	հնարավորություն ընձեռնել առանց կադաստր վարող մարմին անձամբ այցելելու ստանալ հայցվող տեղեկատվությունն անմիջապես (ինտերնետ միջավայրում) և ավելի մատչելի գնով	ՀՀ անշարժ գույքի կադաստրի կոմիտե	30.11.2019 թ.	Ֆինանսավորում չի պահանջվում:
3)	Կնիքի պահանջի վերացում՝ անշարժ գույքի կադաստրի մարմնի կողմից կազմված ավարտական փաստաթղթի արտաքին ձևի` թղթի վրա տրամադրման համար	Արդյունքում կադաստրի մարմնի կողմից կազմված ավարտական գրեթե բոլոր փաստաթղթերը (վկայական, միասնական տեղեկանք, այլ տեղեկանքներ և այլն) սուբյեկտները և այդ փաստաթղթերը պահանջող մարմինները կարող են տեսնել և արտահանել ՀՀ անշարժ գույքի կադաստրի կոմիտեի կայքէջից, ու դիմումատուները ստիպված չեն լինելու ավարտական փաստաթուղթն ստանալու համար այցելել կադաստր վարող մարմին:	ՀՀ անշարժ գույքի կադաստրի կոմիտե	30.11.2019 թ.	Ֆինանսավորում չի պահանջվում:
4)	Անշարժ գույքի գործարքների պարտադիր նոտարական վավերացման անհրաժեշտության բացակայության, ինչպես նաև անշարժ գույքին առնչվող գործարքների տեսակների և նոտարական վավերացում չպահանջող պայմանագրերի օրինակելի ձևերի վերաբերյալ քարոզարշավի շարունակում՝ ներկայացնելով դրանց առավելությունները	գործող կարգավորումների առավելություններից օգտվելու նպատակով շահառուների շրջանակում իրազեկվածության բարձրացում	ՀՀ անշարժ գույքի կադաստրի կոմիտե	սույն հավելվածի հաստատման պահին հաջորդող 10-րդ օրվանից սկսած շարունակական	Ֆինանսավորում չի պահանջվում:
5)	Բողոքարկման մեխանիզմի կատարելագործում՝ ՀՀ անշարժ գույքի կադաստրի կոմիտեում առաջացած խնդիրները քննելու համար	սեփականության իրավունքների գրանցման ռեեստրի տեղեկությունների թափանցիկության ապահովում	ՀՀ անշարժ գույքի կադաստրի կոմիտե	20.06.2019 թ.	Ֆինանսավորում չի պահանջվում:
6)	Սեփականության գրանցման գործընթացում նոտարական վավերացում չպահանջող գործարքների համար ՀՀ անշարժ գույքի կադաստրի կոմիտեի կողմից տրվող միասնական տեղեկանքի տրամադրման պահանջի վերացման ուղղությամբ աշխատանքների մեկնարկ	սեփականության իրավունքների գրանցման ժամկետի կրճատում՝ գործարքը նույն պահին կատարելու համար	ՀՀ անշարժ գույքի կադաստրի կոմիտե	30.11.2019 թ.	Ֆինանսավորում չի պահանջվում:
5. Վարկերի ստացում
1)	Ապահովված իրավունքի իրավական կիրառության ապահովում գույքի օգտագործման արդյունքում ստացված պտուղների, արտադրանքի և եկամուտների նկատմամբ, եթե այլ բան նախատեսված չէ պայմանագրով	ապահովված պարտատերերի իրավունքների պաշտպանության արդյունավետության բարձրացում	ՀՀ արդարադատության նախարարություն	20.06.2019 թ.	Ֆինանսավորում չի պահանջվում:
2)	«Գործարարությամբ զբաղվելը» զեկույցի «Վարկերի ստացում» ցուցչի «Օրինական իրավունքների ամրությունը» ենթացուցչի՝ ըստ ցանկի՝ 11-րդ հարցին «այո» պատասխանի ապահովմանն ուղղված իրավական ակտի նախագծի ներկայացում ՀՀ վարչապետի աշխատակազմ	ապահովված պարտատիրոջ շահերի պաշտպանություն	ՀՀ արդարադատության նախարարություն ՀՀ կենտրոնական բանկ (համաձայնությամբ)	20.06.2019 թ.	Ֆինանսավորում չի պահանջվում:
3)	Հայաստանի Հանրապետության քաղաքացիական օրենսգրքում (այսուհետ՝ քաղաքացիական օրենսգիրք) նախատեսել դրույթ՝ հնարավորություն տալով գրավի պայմանագրով սահմանելու գրավի առարկայի, այդ թվում՝ առարկաների խմբի ընդհանուր նկարագրություն՝ անկախ որևէ չափանիշների	վարկերի ստացման ոլորտի օրենսդրության կատարելագործում	ՀՀ արդարադատության նախարարություն ՀՀ կենտրոնական բանկ (համաձայնությամբ)	20.06.2019 թ.	Ֆինանսավորում չի պահանջվում:
4)	Քաղաքացիական օրենսգրքում և «Շարժական գույքի նկատմամբ ապահովված իրավունքների գրանցման մասին» Հայաստանի Հանրապետության օրենքում նախատեսել դրույթներ, որոնք հնարավորություն կտան գրանցել նաև սեփականության իրավունքի պահպանմամբ կնքվող գործարքից բխող իրավունքները	վարկերի ստացման ոլորտի օրենսդրության կատարելագործում	ՀՀ արդարադատության նախարարություն ՀՀ կենտրոնական բանկ (համաձայնությամբ)	20.06.2019 թ.	Ֆինանսավորում չի պահանջվում:
5)	Գրավի առարկայի գրանցման ժամանակ ռեեստր ներբեռնելու համար պարտապանի կողմից տրվող համաձայնության պարտադիր պահանջի վերացում	վարկերի ստացման ոլորտի օրենսդրության կատարելագործում	ՀՀ արդարադատության նախարարություն ՀՀ կենտրոնական բանկ (համաձայնությամբ)	20.06.2019 թ.	Ֆինանսավորում չի պահանջվում:
6. Փոքր բաժնետերերի պաշտպանություն
1)	Կորպորատիվ կառավարման կանոնակարգի կիրառման դաշտի ընդլայնում՝ գերիշխող դիրք ունեցող ընկերություններում կորպորատիվ կառավարման կանոնակարգի ներդրման մեխանիզմների մշակում	կորպորատիվ կառավարման մեխանիզմների կատարելագործում, կորպորատիվ հաշվետվողականության միջազգայնորեն ընդունված ստանդարտների կիրառում և աշխատողների բաժնետիրացում	ՀՀ տնտեսական զարգացման և ներդրումների նախարարություն	30.11.2019 թ.	Ֆինանսավորում չի պահանջվում:
2)	Squeeze-out մեխանիզմի ուսումնասիրություն և անհրաժեշտության դեպքում այն կարգավորող համապատասխան իրավական ակտերի նախագծերի ներկայացում ՀՀ վարչապետի աշխատակազմ	տեղաբաշխված բաժնետոմսերի համախմբման (կոնսոլիդացիայի) միջոցով փոքր բաժնետերերին՝ ընկերությունից դուրս մղելու (ամբողջությամբ բաժնետոմսերից զրկելու) հնարավորության սահմանափակում	ՀՀ տնտեսական զարգացման և ներդրումների նախարարություն ՀՀ կենտրոնական բանկ (համաձայնությամբ)	30.10.2019 թ.	Ֆինանսավորում չի պահանջվում:
7. Հարկերի վճարում
1)	Հարկային մարմին ներկայացվող հաշվետվությունների և տեղեկությունների թվի կրճատում	հարկային մարմին ներկայացվող հաշվետվությունների և տեղեկությունների վրա ծախսվող ժամանակի կրճատում	ՀՀ պետական եկամուտների կոմիտե	30.11.2019 թ.	Ֆինանսավորում չի պահանջվում:
2)	Հարկային հաշվարկների ինքնաշխատ լրացման (Pre-filing) համակարգի ընդլայնում	հարկային պարտավորությունների հաշվարկման ընթացակարգերի պարզեցում	ՀՀ պետական եկամուտների կոմիտե	30.11.2019 թ.	ֆինանսական միջոցների առկայության դեպքում
3)	Միասնական հաշվին մուտքագրման ենթակա` յուրաքանչյուր հաշվետու եռամսյակին հաջորդող ամսվա 21-ի դրությամբ ԱԱՀ-ի փոխհատուցվող գումարների միասնական հաշվին մուտքագրման ապահովում	ԱԱՀ-ի փոխհատուցվող գումարների միասնական հաշվին մուտքագրման ժամկետների կրճատում	ՀՀ ֆինանսների նախարարություն ՀՀ պետական եկամուտների կոմիտե	30. 12.2019 թ.	Ֆինանսավորում չի պահանջվում:
4)	Միասնական հաշվին մուտքագրման ենթակա` ԱԱՀ-ի փոխհատուցվող գումարների միասնական հաշվին մուտքագրման ժամկետների կրճատում	միասնական հաշվին մուտքագրման ենթակա` ԱԱՀ-ի փոխհատուցվող գումարների միասնական հաշվին մուտքագրման միջին տարեկան ժամկետների շարունակական կրճատում	ՀՀ պետական եկամուտների կոմիտե	30.12.2019 թ.	Ֆինանսավորում չի պահանջվում:
5)	Ուղղակի հարկերի գծով հարկային բեռի նվազեցում	2020 թվականից շահութահարկի դրույքաչափի նվազեցում, օտարերկրյա ֆիզիկական անձանց շահաբաժինների հարկման դրույքաչափի նվազեցում, ինչպես նաև մինչև 2023 թվականը եկամտային հարկի դրույքաչափերի աստիճանական նվազեցում	ՀՀ ֆինանսների նախարարություն	01.09.2019 թ.	Ֆինանսավորում չի պահանջվում:
8. Արտաքին առևտուր
1)	Ապրանքների արտահանմանը և ներմուծմանն օրենսդրությամբ սահմանված կարգով իրենց լիազորությունների շրջանակներում առնչվող՝ ՀՀ պետական գերատեսչությունների, միասնական հսկողության իրականացման նպատակներով մաքսային ձևակերպումների և պետական սահմանային այլ հսկողության տեսակների իրականացման ժամանակակից կենտրոն ստեղծելու իրավական հիմքերի գույքագրում և ըստ անհրաժեշտության իրավական ակտերում փոփոխությունների (լրացումների) կատարում	նվազեցնել գործընթացների ծախսատարությունը և ժամանակատարությունը՝ բացառելով նաև հնարավոր կամայականությունները	ՀՀ պետական եկամուտների կոմիտե շահագրգիռ պետական մարմիններ	30.11.2019 թ.	ֆինանսական միջոցների առկայության դեպքում
2)	ՀՀ պետական եկամուտների կոմիտեի և ՀՀ ազգային անվտանգության ծառայության կողմից առկա հսկողական գործիքների համատեղ օգտագործում, այդ թվում՝ ՀՀ արտաքին առևտրի ազգային մեկ պատուհանի և ՍԷԿՏ համակարգերի ինտեգրում	սահմանահատման գործընթացում ծախսվող ժամանակի կրճատում	ՀՀ պետական եկամուտների կոմիտե ՀՀ ազգային անվտանգության ծառայություն	30.11.2019 թ.	ֆինանսական միջոցների առկայության դեպքում
3)	Մեծ ծավալի տվյալների (Big Data) ժամանակակից կառուցվածքով տվյալների շտեմարանների մշակման գործիքների ներդնում	առավել արդյունավետ ռիսկերի վերլուծությունների արդյունքում արդիական ռիսկի պրոֆիլների կիրառմամբ ավելի արդյունավետ թիրախավորված հսկողության իրականացում՝ նվազեցնելով զննման դեպքերի քանակը	ՀՀ պետական եկամուտների կոմիտե	30.11.2019 թ.	ֆինանսական միջոցների առկայության դեպքում
4)	Ուսումնասիրել արտահանման և ներմուծման ժամանակ սննդամթերքի անվտանգության սերտիֆիկատի առկայության պարտադիր պահանջի վերացման հնարավորությունը, և անհրաժեշտության պարագայում ներկայացնել առաջարկություն ՀՀ վարչապետի աշխատակազմ	արտահանման ընթացակարգի ժամանակատարության կրճատում	ՀՀ գյուղատնտեսության նախարարություն ՀՀ սննդամթերքի անվտանգության տեսչական մարմին	30.06.2019 թ.	Ֆինանսավորում չի պահանջվում:
5)	Ապրանքների և տրանսպորտային միջոցների ինքնաշխատ բացթողման էլեկտրոնային համակարգի ներդրում (ավտոմատ բացթողում)՝ առանց մաքսային մարմինների գտնվելու վայրեր այցելության	մաքսային գործառնությունների իրականացման վրա ծախսվող ժամանակահատվածի կրճատում	ՀՀ պետական եկամուտների կոմիտե շահագրգիռ պետական մարմիններ	30.11.2019 թ.	ֆինանսական միջոցների առկայության դեպքում
6)	Տեղեկատվության գաղտնի ստացման համար նախատեսված հատուկ տեխնիկական միջոցները երրորդ երկրներից ՀՀ մաքսային տարածք ներմուծելու և ՀՀ մաքսային տարածքից երրորդ երկրներ արտահանելու համար ՀՀ ազգային անվտանգության ծառայության կողմից լիցենզիայի տրամադրման համար պահանջվող ժամկետների կրճատում	լիցենզիայի ժամկետների կրճատում	ՀՀ ազգային անվտանգության ծառայություն	20.06. 2019 թ.	Ֆինանսավորում չի պահանջվում:
7)	Ապրանքների արտահանման թույլտվություն ստանալու համար նախատեսված երկակի նշանակության և ռազմական նշանակության ապրանքների փորձագիտական եզրակացության տրամադրման գործընթացի պարզեցում	եզրակացության տրամադրման նպատակով վճարվող գումարի սահմանաչափի և տրամադրման ժամկետի նվազեցում	ՀՀ տնտեսական զարգացման և ներդրումների նախարարություն	15.06.2019 թ.	Ֆինանսավորում չի պահանջվում:
9. Պայմանագրերի կիրարկում
1)	Pro-bono իրավաբանական ծառայություններ մատուցող անձանց խրախուսման մեխանիզմների ներդնում	արդարադատության մատչելիության ապահովում	ՀՀ արդարադատության նախարարություն	30.06. 2019 թ.	Ֆինանսավորում չի պահանջվում:
2)	Քաղաքացիական դատավարության օրենսգրքով նախատեսված՝ պարզեցված վարույթի ինստիտուտի կատարելագործում	դատական գործերի քննության ժամկետների կրճատում, դատարանների ծանրաբեռնվածության նվազեցում	ՀՀ արդարադատության նախարարություն	30.06. 2019 թ.	Ֆինանսավորում չի պահանջվում:
3)	Պարտապանին պատկանող գույքի հայտնաբերման, այդ թվում՝ պարտապանին պատկանող գույքի հայտարարագրման, չգրանցված իրավունքների գրանցման, դատական ակտերի կամավոր կատարման խթանման գործիքակազմի ներդնում, կատարողական թերթին ներկայացվող պահանջների վերանայում	հարկադիր կատարման ժամկետների և վարույթի արդյունավետության ինդեքսի բարձրացում	ՀՀ արդարադատության նախարարություն	30.06. 2019 թ.	Ֆինանսավորում չի պահանջվում:
4)	Դատական տեղեկատվական համակարգի կատարելագործում, այդ թվում՝ դատական գործերի վարման էլեկտրոնային համակարգի զարգացում	տեղեկատվության հասանելիություն, դատավարական փաստաթղթերի մատչելիություն, ժամանակային ծախսերի նվազեցում	ՀՀ արդարադատության նախարարություն	30.09.2019 թ.	ՀՀ օրենքով չարգելված այլ աղբյուրներ
5)	Դատարանի կողմից էլեկտրոնային եղանակով դատավարական փաստաթղթեր առաքելու հնարավորության նախատեսում	արդարադատության մատչելիություն, ժամանակային ծախսերի նվազեցում	ՀՀ արդարադատության նախարարություն	30.09.2019 թ.	ՀՀ օրենքով չարգելված այլ աղբյուրներ
6)	Առևտրային վեճերի (հասկացությունը՝ «Առևտրային արբիտրաժի մասին» ՀՀ օրենքի 2-րդ հոդվածի 4-րդ կետ) դատական գործերի ժամանակատարության և ընթացակարգերի ուսումնասիրություն՝ ըստ փուլերի՝ գործերի քննության ուշացումների պատճառների հայտնաբերման նպատակով Փուլերը տարանջատել ըստ գործարարությամբ զբաղվելը զեկույցի համապատասխան բաժնի հարցաշարի	դատական գործերի քննության ժամանակի կրճատում	ՀՀ արդարադատության նախարարություն ՀՀ դատական դեպարտամենտ (համաձայնությամբ)	30.09.2019 թ.	Ֆինանսավորում չի պահանջվում:
7)	«Ֆինանսական համակարգում արբիտրաժային հաստատության մասին» ՀՀ օրենքի և հարակից օրենքների նախագծերի մշակում	գործերի քննության ժամկետների և ծախսերի կրճատում	ՀՀ արդարադատության նախարարություն ՀՀ կենտրոնական բանկ (համաձայնությամբ)	30.12.2019 թ.	ՀՀ օրենքով չարգելված այլ աղբյուրներ
10. Սնանկության ճանաչում
1)	Սնանկության վարույթի ընթացքում պարտապանի կողմից իր կենսունակության համար անհրաժեշտ պայմանագրերը շարունակելու և իր համար անբարենպաստ պայմանագրերի կատարումից հրաժարվելու հնարավորության նախատեսում	ֆինանսական առողջացման ծրագրի արդյունավետ իրագործում և տնտեսավարող սուբյեկտի բնականոն գործունեության վերականգնում	ՀՀ արդարադատության նախարարություն	20.06.2019 թ.	Ֆինանսավորում չի պահանջվում:
2)	Սնանկության վարույթի ընթացքում կատարվող գործողությունների համար հստակ ժամկետների սահմանում	սնանկության վարույթի արդյունավետության բարձրացում և ժամկետների կրճատում	ՀՀ արդարադատության նախարարություն	20.06.2019 թ.	Ֆինանսավորում չի պահանջվում:
3)	Սնանկության վարույթի ընթացքում պարտապանի կողմից վարկեր ստանալու հնարավորության նախատեսում	ֆինանսական առողջացման արդյունավետ իրականացում, ինչպես նաև ստանձնած պարտավորությունների իրականացում	ՀՀ արդարադատության նախարարություն	20.06.2019 թ.	Ֆինանսավորում չի պահանջվում:
4)	Պարտատերերի կողմից կառավարչից ֆինանսական տեղեկություններ պահանջելու հնարավորության սահմանում և համապատասխան իրավական ակտի նախագծի ներկայացում ՀՀ վարչապետի աշխատակազմ	սնանկության վարույթի արդյունավետության բարձրացում	ՀՀ արդարադատության նախարարություն	20.06.2019 թ.	Ֆինանսավորում չի պահանջվում:
5)	Սնանկության կառավարչի ընտրության հարցում պարտատերերի ներգրավվածության բարձրացման նոր եղանակներ նախատեսող համապատասխան իրավական ակտի նախագծի մշակում և ներկայացում ՀՀ վարչապետի աշխատակազմ	սնանկության վարույթի արդյունավետության բարձրացում	ՀՀ արդարադատության նախարարություն	20.06.2019 թ.	Ֆինանսավորում չի պահանջվում:

Հայաստանի Հանրապետության վարչապետ

Ն. Փաշինյան