ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ Ո Ւ Մ

20 հուլիսի 2017 թվականի N 853-Ա

ՀԱՅԱՍՏԱՆՅԱՅՑ ԱՌԱՔԵԼԱԿԱՆ ՍՈՒՐԲ ԵԿԵՂԵՑՈՒՆ ԱՆՀԱՏՈՒՅՑ ՍԵՓԱԿԱՆՈՒԹՅԱՆ ԻՐԱՎՈՒՆՔՈՎ ՀՈՂԱՄԱՍ ՏՐԱՄԱԴՐԵԼՈՒ ՄԱՍԻՆ

Հիմք ընդունելով Հայաստանի Հանրապետության հողային օրենսգրքի 64-րդ հոդվածի 1.2-րդ մասը և «Պետական ոչ առևտրային կազմակերպությունների մասին» Հայաստանի Հանրապետության օրենքի 5-րդ հոդվածի 2-րդ մասով սահմանված դրույթները` Հայաստանի Հանրապետության կառավարությունը որոշում է.

1. Հայաստանի Հանրապետության կառավարությանն առընթեր պետական գույքի կառավարման վարչության տնօրինության` Հայաստանի Հանրապետության Արմավիրի մարզի Վաղարշապատի համայնքի Իսի-Լե-Մուլինոյի փողոցի 1 հասցեում գտնվող պետական սեփականություն հանդիսացող 4.9134 հեկտար հողամասից 1,4 հեկտար հողամասը (այսուհետ՝ հողամաս) հետ վերցնել Հայաստանի Հանրապետության գյուղատնտեսության նախարարության «Երկրագործության գիտական կենտրոն» պետական ոչ առևտրային կազմակերպությունից և անհատույց սեփականության իրավունքով տրամադրել Հայաստանյայց Առաքելական Սուրբ Եկեղեցուն:

2. Հայաստանի Հանրապետության կառավարությանն առընթեր պետական գույքի կառավարման վարչության պետին`

1) Հայաստանի Հանրապետության Արմավիրի մարզպետի հետ համատեղ եռամսյա ժամկետում իրականացնել սույն որոշման 1-ին կետում նշված հողամասերի չափագրման, առանձնացման, ապահովել սույն որոշման հավելվածի համաձայն 1.4 հա հողամասի նպատակային նշանակության փոփոխման և որպես անշարժ գույքի առանձին գույքային միավորների գրանցման աշխատանքները.

2) սույն կետի 1-ին ենթակետում նշված աշխատանքների ավարտից հետո, երկամսյա ժամկետում, հիմք ընդունելով անշարժ գույքի չափագրման, առանձնացման և գրանցման արդյունքում ստացված մակերեսները, «Երկրագործության գիտական կենտրոն» պետական ոչ առևտրային կազմակերպության հետ կնքել 2007 թվականի դեկտեմբերի 25-ին կնքված ոչ բնակելի տարածքի անհատույց օգտագործման N 54/007-5 պայմանագրում սույն որոշումից բխող փոփոխություններ կատարելու մասին համաձայնագիր (այսուհետ՝ համաձայնագիր)՝ միևնույն ժամանակ սահմանելով, որ համաձայնագրի նոտարական վավերացման և դրանից ծագող գույքային իրավունքների պետական գրանցման ծախսերը ենթակա են իրականացման Հայաստանյայց Առաքելական Սուրբ Եկեղեցու միջոցների հաշվին.

3) սույն կետի 1-ին և 2-րդ ենթակետերում նշված աշխատանքների ավարտից հետո, երկամսյա ժամկետում, հիմք ընդունելով սույն որոշման 1-ին կետում նշված հողամասի առանձնացման և գրանցման արդյունքում ստացված մակերեսները, Հայաստանյայց Առաքելական Սուրբ Եկեղեցու հետ համատեղ իրականացնել համապատասխան պայմանագրի կնքման և հողամասի հանձնման-ընդունման աշխատանքները՝ պայմանագրում նախատեսելով, որ՝

ա. պայմանագրի նոտարական վավերացման և պայմանագրից ծագող գույքային իրավունքների պետական գրանցման ծախսերը ենթակա են իրականացման Հայաստանյայց Առաքելական Սուրբ Եկեղեցու միջոցների հաշվին,

բ. Հայաստանյայց Առաքելական Սուրբ Եկեղեցին պարտավոր է ապահովել «Երկրագործության գիտական կենտրոն» պետական ոչ առևտրային կազմակերպությանն իր հողատարածքներ, ինչպես նաև հանձնվող հողամասին կից գտնվող խորքային հորի տարածք մուտքը (անհրաժեշտության դեպքում` ճանապարհների կառուցմամբ):

(2-րդ կետը լրաց. 14.09.17 N 1128-Ա)

Հավելված ՀՀ կառավարության 2017 թվականի հուլիսի 20-ի N 853-Ա որոշման

(հավելվածը լրաց. 14.09.17 N 1128-Ա)