16 հուլիսի 2015 թվականի N 792-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՐԻՔՆԵՐԻ ՀԱՄԱՐ ԻՆՍՈՒԼԻՆ ԼԻԶՊՐՈ 100 ՄՄ/ՄԼ ԵՎ ԻՆՍՈՒԼԻՆ ՄԱՐԴՈՒ ԻԶՈՖԱՆ (ՌԵԿՈՄԲԻՆԱՆՏ) 100 ՄՄ/ՄԼ ԴԵՂԵՐԻ ԳՆՄԱՆ 2015-2019 ԹՎԱԿԱՆՆԵՐԻ ԵՎ ինսուլին գլարգին 100 ՄՄ/մլ դեղի գնման 2017-2019 թվականների ԳՈՐԾԸՆԹԱՑԸ ԿԱԶՄԱԿԵՐՊԵԼՈՒ ՄԱՍԻՆ
(վերնագիրը լրաց. 13.04.17 N 393-Ն)

Հիմք ընդունելով Հայաստանի Հանրապետության կառավարության 2011 թվականի փետրվարի 10-ի N 168-Ն որոշման 1-ին կետով հաստատված գնումների գործընթացի կազմակերպման կարգի 3-րդ կետը և Հայաստանի Հանրապետությունում շաքարային դիաբետով տառապող երեխաների ու երիտասարդների բժշկական օգնության և սպասարկման բարելավման նպատակով Հայաստանի Հանրապետության կառավարությունը որոշում է.

1. Սահմանել, որ Հայաստանի Հանրապետության 2015-2019 թվականների կարիքների համար Հայաստանի Հանրապետության առողջապահության նախարարության կողմից ամերիկյան «Էլայ Լիլլի և Քամփնի» ընկերության արտադրության ինսուլին լիզպրո 100 ՄՄ/մլ, ինսուլին մարդու իզոֆան (ռեկոմբինանտ) 100 ՄՄ/մլ և ինսուլին գլարգին 100 ՄՄ/մլ դեղերի գնումներն իրականացվելու են «Էլայ Լիլլի և Քամփնի» ընկերությունից` ընկերության հայաստանյան գործընկեր «ՄԼՆ-ֆարմ» սահմանափակ պատասխանատվությամբ ընկերության միջոցով` «Էլայ Լիլլի և Քամփնի» ընկերության կողմից առաջարկված գների համաձայն:

(1-ին կետը փոփ. 13.04.17 N 393-Ն)

2. Հաստատել`

1) ինսուլին լիզպրո 100 ՄՄ/մլ, ինսուլին մարդու իզոֆան (ռեկոմբինանտ) 100 ՄՄ/մլ և ինսուլին գլարգին 100 ՄՄ/մլ դեղերի ձեռքբերման ընթացակարգային արձանագրությունը` համաձայն N 1 հավելվածի.

2) ինսուլին լիզպրո 100 ՄՄ/մլ, ինսուլին մարդու իզոֆան (ռեկոմբինանտ) 100 ՄՄ/մլ և ինսուլին գլարգին 100 ՄՄ/մլ դեղերի գները` համաձայն N 2 հավելվածի:

(2-րդ կետը փոփ. 13.04.17 N 393-Ն)

3. Հավանություն տալ`

1) Հայաստանի Հանրապետության առողջապահության նախարարության, «Էլայ Լիլլի և Քամփնի» ընկերության և «Հաղթենք դիաբետը միասին» հասարակական կազմակերպության միջև համագործակցության մասին» փոխըմբռնման հուշագրի նախագծին` համաձայն N 3 հավելվածի.

2) Հայաստանի Հանրապետության կարիքների համար «Էլայ Լիլլի և Քամփնի» ընկերության կողմից «ՄԼՆ-ֆարմ» սահմանափակ պատասխանատվությամբ ընկերության և «Հաղթենք դիաբետը միասին» հասարակական կազմակերպության միջոցով անհատույց տրամադրվող բժշկական նշանակության ապրանքների (գրիչ-ներարկիչներ, ասեղներ, գլիկոլիզացված հեմոգլոբինի սարքեր և դրանց թեստերը) տպագիր նյութերի և աշխատանքների ցանկին` համաձայն N 4 հավելվածի:

4. Հայաստանի Հանրապետության առողջապահության նախարարին` 2015-2019 թվականների կարիքների համար ինսուլին լիզպրո 100 ՄՄ/մլ և ինսուլին մարդու իզոֆան (ռեկոմբինանտ) 100 ՄՄ/մլ դեղերի գնման մասին պայմանագրում ներառել դրույթ, որով պայմանագրի համաձայն մատակարարվող դեղի դիմաց վճարումներն իրականացվելու են սույն որոշման 3-րդ կետի 1-ին ենթակետով հավանության արժանացած հուշագրով սահմանված ծրագրի միջոցառումների` ըստ ժամանակացույցի կատարման պայմանով:

5. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

 

Հայաստանի Հանրապետության վարչապետ	Հ. Աբրահամյան
2015 թ. հուլիսի 20 Երևան

Հավելված N 1 ՀՀ կառավարության 2015 թվականի հուլիսի 16-ի N 792-Ն որոշման

Ը Ն Թ Ա Ց Ա Կ Ա Ր Գ Ա Յ Ի Ն    Ա Ր Ձ Ա Ն Ա Գ Ր ՈՒ Թ Յ ՈՒ Ն

ԻՆՍՈՒԼԻՆ ԼԻԶՊՐՈ 100 ՄՄ/ՄԼ, ԻՆՍՈՒԼԻՆ ՄԱՐԴՈՒ ԻԶՈՖԱՆ (ՌԵԿՈՄԲԻՆԱՆՏ) 100 ՄՄ/ՄԼ ԵՎ ԻՆՍՈՒԼԻՆ ԳԼԱՐԳԻՆ 100 ՄՄ/ՄԼ ԴԵՂԵՐԻ ՁԵՌՔԲԵՐՄԱՆ ՄԱՍԻՆ
(վերնագիրը խմբ. 13.04.17 N 393-Ն)

1. Հիմք ընդունելով Հայաստանի Հանրապետության կառավարության 2012 թվականի հոկտեմբերի 18-ի N 42 արձանագրային որոշման N 1 հավելվածի 14-րդ կետը՝ Հայաստանի Հանրապետության առողջապահության նախարարությունն իրականացրել է գնման ընթացակարգ, մասնավորապես, 2014 թվականի դեկտեմբերին Հայաստանի Հանրապետության առողջապահության նախարարության կողմից հայտարարվել է հակադիաբեթիկ դեղերի ձեռքբերման գնման ընթացակարգ, որին մասնակցելու համար հայտ է ներկայացրել միայն «Էլայ Լիլլի և Քամփնի» ընկերության հայաստանյան գործընկեր «ՄԼՆ-ֆարմ» սահմանափակ պատասխանատվությամբ ընկերությունը՝ հետևյալ գներով` ինսուլին լիզպրո 100 ՄՄ/մլ` մեկ փամփուշտի համար՝ 14.21 ԱՄՆ-ի դոլարին համարժեք դրամ, ինսուլին մարդու իզոֆան (ռեկոմբինանտ) 100 ՄՄ/մլ` մեկ փամփուշտի համար՝ 6.1 ԱՄՆ-ի դոլարին համարժեք դրամ, 2017 թվականի առաջին կիսամյակից սկսած՝ նաև ինսուլին գլարգին 100 ՄՄ/մլ` մեկ փամփուշտի համար՝ 10 ԱՄՆ-ի դոլարին համարժեք դրամ:

2. Ստացված հայտի բացումից և գնահատումից հետո` պայմանագրի նախագծի շուրջ վարվող բանակցությունների ընթացքում «Էլայ Լիլլի և Քամփնի» ընկերության կողմից ներկայացվում են նոր գնային առաջարկ և ծրագիր: Մասնավորապես, Հայաստանի Հանրապետության առողջապահության նախարարություն է ներկայացվել Հայաստանի Հանրապետությունում շաքարային դիաբեթով տառապող երեխաների ու երիտասարդների համար հնգամյա ծրագիր իրականացնելու վերաբերյալ առաջարկ, որտեղ, բացի ապրանքային գնային իջեցված առաջարկներից (քան ներկայացվել է գնման ընթացակարգի ընթացքում հայտեր ներկայացնելու ժամանակ), հաշվի առած հետագա բանակցությունների արդյունքները (ըստ սկզբնական առաջարկի` ինսուլին լիզպրո 100 ՄՄ/մլ` մեկ փամփուշտի համար՝ 9 ԱՄՆ-ի դոլարին համարժեք դրամ, ինսուլին մարդու իզոֆան (ռեկոմբինանտ) 100 ՄՄ/մլ` մեկ փամփուշտի համար՝ 5 ԱՄՆ-ի դոլարին համարժեք դրամ և 2017 թվականին ինսուլին գլարգին 100 ՄՄ/մլ` մեկ փամփուշտի համար՝ 10 ԱՄՆ-ի դոլարին համարժեք դրամ, ինսուլին լիզպրո 100 ՄՄ/մլ` մեկ փամփուշտի համար՝ 8.5 ԱՄՆ-ի դոլարին համարժեք դրամ, ինսուլին մարդու իզոֆան (ռեկոմբինանտ) 100 ՄՄ/մլ` մեկ փամփուշտի համար՝ 4.7 ԱՄՆ-ի դոլարին համարժեք դրամ և 2017 թվականին ինսուլին գլարգին 100 ՄՄ/մլ` մեկ փամփուշտի համար՝ 9,5 ԱՄՆ-ի դոլարին համարժեք դրամ), ներկայացված է նաև 5 տարվա ընթացքում իրականացվող ծրագրային ներդրումների վերաբերյալ առաջարկ:

3. Հաշվի առնելով նշվածը՝ Հայաստանի Հանրապետության առողջապահության նախարարությունը որոշել է դիմել ինսուլին արտադրող այլ կազմակերպությունների՝ նմանատիպ ծրագրային առաջարկ ստանալու համար, ինչի արդյունքում Հայաստանի Հանրապետության առողջապահության նախարարության կողմից նամակ է ուղարկվել ինսուլին արտադրող մնացած 2 կազմակերպություն՝ նմանատիպ ծրագրի իրականացման վերաբերյալ առաջարկներ ներկայացնելու համար: Արդյունքում՝ «Սանոֆի Ավենտիս» ընկերությունը չի արձագանքել, իսկ «Նովոնորդիսկ» ընկերությունն ուղարկել է առաջարկ: 2017 թվականին ինսուլին գլարգին 100 ՄՄ/մլ` մեկ փամփուշտի համար առաջարկներ են ներկայացվել «Սանոֆի Ավենտիս», «Նովոնորդիսկ», «Էլայ Լիլլի և Քամփնի» ընկերություններից, ընդ որում, «Էլայ Լիլլի և Քամփնի» ընկերության կողմից քարթրիջների համար նախատեսված գրիչները և ասեղները տրամադրվելու են անվճար:

4. Ստորև ներկայացվում է «Նովոնորդիսկ», «Էլայ Լիլլի և Քամփնի» և «Սանոֆի Ավենտիս» ընկերությունների առաջարկների համեմատական աղյուսակը: