● Ներդրումային վարկի սպասարկման և մարման համար Կառավարչի հաշվին վճարել գումարներ` Համաձայնագրի համաձայն, այդ թվում` սկզբնական միանվագ միջնորդավճար, որը հավասար է Ներդրումային վարկի գումարի 0,5 (զրո ամբողջ հինգ տասնորդական) տոկոսին, որը վճարվում է ոչ ուշ, քան Համաձայնագրի ուժի մեջ մտնելու օրվանից 60 օր անց, տոկոսներ` տարեկան 1.65 (մեկ ամբողջ վաթսունհինգ հարյուրերորդական) տոկոս դրույքաչափով, որոնք հաշվարկվում և վճարվում են յուրաքանչյուր կիսամյակ` յուրաքանչյուր կիսամյակի վերջին ամսվա 30-ին, սկսած այն կիսամյակից, երբ կատարվել է Ներդրումային վարկի միջոցների առաջին հատկացումը, և ավարտված Ներդրումային վարկի հիմնական պարտքի եզրափակիչ վճարման ժամկետով, հիմնական պարտք` համաձայն Հավելված 3-ով սահմանված` Հիմնական պարտքի մարման ժամանակացույցի, Համաձայնագրով և Հավելված 1-ով նախատեսված այլ վճարումներ (Համաձայնագրի հոդված 3, կետ 3.1., Հավելված 3, Բաժին 3.01. և Հավելված 2),

● ապահովել Նախագծի իրականացումը՝ Համաձայնագրով և Հավելված 1-ի 4.01. բաժնի պահանջներով սահմանված կարգով և պայմաններով՝ Համաձայնագրի Հավելված 5-ում նկարագրված` Նախագծի իրականացման ծրագրին համապատասխան (Համաձայնագրի հոդված 4, կետ 4. 1., ենթակետ «ա»),

● Նախագծի իրականացման ընթացքում ապահովել Համաձայնագրի Հավելված 2-ում նշված քաղաքականության և ընթացակարգերի կիրառելի պահանջների կատարումը, հաշվետվությունների և փաստաթղթերի կազմումը և տրամադրումը Կառավարչին՝ նշված քաղաքականությանը և ընթացակարգերին համապատասխան (Համաձայնագրի հոդված 4, կետ 4.1., ենթակետ «բ»),

● ապահովել տեխնիկական միջոցների, ծառայությունների և այլ ռեսուրսների տրամադրումը, որոնք պահանջվում են Նախագծի արդյունավետ ապահովման համար՝ Հավելված 1-ի 4.01. բաժնի (բ) կետին համապատասխան, ամեն տարի ՀՀ բյուջեից առանձնացնել բավականաչափ ծավալով հատկացումներ` Նախագծի իրականացման ծախսերի ֆինանսավորման, այդ թվում` Հավելված 1-ի 2.03. բաժնում նշված հարկերի վճարման և ԱԶԲ-ի` վերաբնակեցման մասով պաշտպանական միջոցների քաղաքականության պահանջների կատարման նպատակով (Համաձայնագրի հոդված 4, կետ 4.1., ենթակետ «գ»),

● ապահովել Նախագծի մոնիթորինգը և գնահատումը, ինչպես նաև Նախագծի իրականացման ընթացքի մասին Համաձայնագրով նախատեսված հաշվետվության տրամադրումը` Հավելված 1-ի 4.03. բաժնի և Հավելված 6-ի համաձայն (Համաձայնագրի հոդված 4, կետ 4.1., ենթակետ «ե»),

● ապահովել Նախագծի ֆինանսական մոնիթորինգի մասին հաշվետվության պատրաստումը և Կառավարչին ներկայացումը` Կառավարչին բավարարող ձևով և բովանդակությամբ (Համաձայնագրի հոդված 4, կետ 4.1., ենթակետ «զ»),

● ապահովել Ներդրումային վարկի միջոցների ֆինանսական կառավարումը, ֆինանսական հաշվետվության աուդիտի անցկացումը և Կառավարչին տեղեկատվության տրամադրումը` Հավելված 1-ի 4.04. բաժնի պահանջներին համապատասխան (Համաձայնագրի հոդված 4, կետ 4.1., ենթակետ «է»),

● ապահովել Նախագծի ֆինանսավորման համար հատկացված միջոցների օգտագործումը՝ Հավելված 8-ում նկարագրված միջոցների օգտագործման ընթացակարգերին համապատասխան (Համաձայնագրի հոդված 4, կետ 4.1., ենթակետ «ը»),

● Ներդրումային վարկի միջոցներից ապահովել Նախագծի իրականացման համար անհրաժեշտ ապրանքների, աշխատանքների և ծառայությունների գնումների իրականացումը Հավելված 7-ում նկարագրված գնումների ընթացակարգերին համապատասխան (Համաձայնագրի հոդված 4, կետ 4.1., ենթակետ «թ»),

● ապահովել ՀՀ տրանսպորտի և կապի նախարարությունում (կամ դրա իրավահաջորդում) «Նախագծի իրականացման խումբ» կառուցվածքային ստորաբաժանման ձևավորումը` կազմված մասնագետներից, որոնց մրցունակությունը թույլ է տալիս արդյունավետ իրականացնել Նախագիծը՝ Հավելված 2-ում նշված քաղաքականության և ընթացակարգերի համաձայն, ներառյալ` «Նախագծի իրականացման խմբի» գործունեության ապահովումը Նախագծի իրականացման և վերջնական հաշվետվության տրամադրման ամբողջ ժամանակահատվածի ընթացքում, ինչպես նաև «Նախագծի իրականացման խմբին» ռեսուրսների տրամադրումը, որոնք անհրաժեշտ են հանձնարարված գործողությունների կատարման համար (Համաձայնագրի հոդված 4, կետ 4.1., ենթակետ «ժ»),

● Կառավարչին ներկայացնել տեղեկատվություն ՀՀ ֆինանսական և տնտեսական պայմանների մասին` համաձայն Հավելված 1-ի 5.01. բաժնի (Համաձայնագրի հոդված 4, կետ 4.3.),

● ապահովել, որպեսզի ՀՀ որևէ արտաքին պարտք չունենա առավելություն Ներդրումային վարկի պարտքի նկատմամբ՝ Հավելված 1-ի 6.01. բաժնի դրույթներին համապատասխան (Համաձայնագրի հոդված 4, կետ 4.4.):

5. Հյուսիս-հարավ ճանապարհային միջանցքի ներդրումային ծրագրի նախագծերը ֆինանսավորելու նպատակով Հայաստանի Հանրապետությունը կնքել է մի շարք այլ միջազգային պայմանագրեր, մասնավորապես.

● 2009 թվականի սեպտեմբերի 15-ին ստորագրված` Հայաստանի Հանրապետության և Ասիական զարգացման բանկի միջև շրջանակային ֆինանսավորման համաձայնագիր (ՀՀ կողմից վավերացվել է 2010թ. փետրվարի 2-ին` Ազգային ժողովի 186-Ն որոշմամբ (ՍԴՈ-860),

● 2009թ. հոկտեմբերի 12-ին ստորագրված` «Հայաստանի Հանրապետության և Ասիական զարգացման բանկի միջև «Հյուսիս-հարավ ճանապարհային միջանցքի ներդրումային ծրագիր-Ծրագիր 1 (Հատուկ գործողություններ)» վարկային համաձայնագիր (ՀՀ կողմից վավերացվել է 2010թ. փետրվարի 2-ին` Ազգային ժողովի 187-Ն որոշմամբ (ՍԴՈ-861), որով ԱԶԲ-ն իր Հատուկ ֆոնդի ռեսուրսներից ՀՀ-ին տրամադրել է 38.443.000 փոխառության հատուկ իրավունքներին (ՓՀԻ) համարժեք գումարի չափով վարկ,

● 2011թ. մայիսի 30-ին ստորագրված` «Հայաստանի Հանրապետության և Ասիական զարգացման բանկի միջև «Հյուսիս-հարավ ճանապարհային միջանցքի ներդրումային ծրագիր-Ծրագիր 2» վարկային համաձայնագիր (ՀՀ կողմից վավերացվել է 2011թ. հունիսի 23-ին` Ազգային ժողովի 280-Ն որոշմամբ (ՍԴՈ-979),

● Հայաստանի Հանրապետության և Եվրոպական ներդրումային բանկի միջև 2013 թվականի նոյեմբերի 7-ին և 2013 թվականի նոյեմբերի 18-ին ստորագրված` «Հայաստանի «Հյուսիս-հարավ» ճանապարհային միջանցք» ֆինանսական պայմանագիր (ՀՀ կողմից վավերացվել է 2014թ. հունիսի 10-ին` Ազգային ժողովի 119-Ն որոշմամբ (ՍԴՈ-1151),

● 2014թ. մարտի 11-ին ստորագրված` «Հայաստանի Հանրապետության և Ասիական զարգացման բանկի միջև «Հյուսիս-հարավ ճանապարհային միջանցքի ներդրումային ծրագիր-Ծրագիր 3 (ընդհանուր գործողություններ)» վարկային համաձայնագիր (ՀՀ կողմից վավերացվել է 2014թ. հունիսի 10-ին` Ազգային ժողովի 118-Ն որոշմամբ (ՍԴՈ-1152),

● Հայաստանի Հանրապետության և Ասիական զարգացման բանկի միջև 2014 թվականի հունվարի 21-ին և 2014 թվականի հունիսի 11-ին ստորագրված` «Հայաստանի Հանրապետության և Ասիական զարգացման բանկի միջև 2011 թվականի մայիսի 30-ին ստորագրված` «Հյուսիս-հարավ ճանապարհային միջանցքի ներդրումային ծրագիր-Ծրագիր 2» վարկային համաձայնագրում (հատուկ գործողություններ) փոփոխություն կատարելու մասին նամակ-համաձայնագիր (վավերացման մասին տեղեկատվությունը բացակայում է (ՍԴՈ-1158), որով Վարկային համաձայնագրով նախատեսված Ծրագիր 2-ի շրջանակներում վարկի փակման ժամկետը երկարաձգվում է 24 ամսով և ՀՀ-ն ստանձնում է պարտավորություն` վճարել լրացուցիչ պարտավճար` շուրջ 240.000 ԱՄՆ դոլարի չափով:

6. Քննության առարկա Համաձայնագրի շրջանակներում կիրառվում են մի շարք կանոններ և ընթացակարգեր, մասնավորապես`

● Եվրասիական տնտեսական ընկերակցության Հակաճգնաժամային հիմնադրամի միջոցներից ֆինանսավորվող նախագծերի գնումների քաղաքականությունը (հաստատված է Հիմնադրամի Խորհրդի` 2013թ. հուլիսի 10-ի որոշմամբ, արձանագրություն թիվ 11),

● Վերակառուցման և զարգացման միջազգային բանկի (ՎԶՄԲ) 2011 թվականի հունվարի` «Համաշխարհային բանկի փոխառուների կողմից ՎԶՄԲ փոխառություններով և ԶՄԱ վարկերով ապրանքների, աշխատանքների և ոչ խորհրդատվական ծառայությունների գնումներ» ուղեցույցը (Guidelines: Procurment of Goods, Works and Non-consulting Services under IBRD Loans and IDA Credits & Grants by World Bank Borrowers, January 2011),

● Վերակառուցման և զարգացման միջազգային բանկի (ՎԶՄԲ) 2011 թվականի հունվարի` «ՎԶՄԲ փոխառություններով և ԶՄԱ վարկերով խորհրդատուների ընտրություն և վարձում» ուղեցույցը (Guidelines: Selection and employment of Consultants under IBRD Loans and IDA Credits & Grants by Word Bank Borrowers, January 2011),

● Ասիական զարգացման բանկի (ԱԶԲ) 2009թ. հունիսի` «Կանոնակարգ պաշտպանական միջոցների քաղաքականության մասին» գործառութային քաղաքականությունը (Asian Development Bank Policy Paper: Safeguard Policy Statement, June 2009),

● Ասիական զարգացման բանկի 1998 հուլիսի` հակակոռուպցիոն քաղաքականությունը (Asian Development Bank: Anticorruption Policy, July 1998),

● Ասիական զարգացման բանկի 2012 թվականի դեկտեմբերի` թափանցիկության սկզբունքները և ուղեցույցները (Asian Development Bank Integrity Principles and Guidelines, December 2012),

● Ասիական զարգացման բանկի 2011 թվականի հոկտեմբերի` «Տեղեկատվության բացահայտում և փոխանակում» հասարակության հետ կապերի քաղաքականությունը (Asian Development Bank Public Communications Policy: Disclosure and Exchange of Information, Օctober 2011):

ՀՀ սահմանադրական դատարանն արձանագրում է, որ սույն ծրագրի իրականացմանն առնչվող վարկային համաձայնագրի վերաբերյալ, մասնավորապես` 2014թ. մայիսի 27-ի ՍԴՈ-1151 որոշման շրջանակներում ՀՀ սահմանադրական դատարանն արձանագրել է նաև, որ. «ՀՀ վերահսկիչ պալատի կողմից բացահայտված թերությունների և բացթողումների բացառումը, ինչպես նաև արված եզրակացությունների և առաջարկությունների կենսագործումը վերոհիշյալ Պայմանագրով ստանձնած ՀՀ պարտավորությունների արդյունավետ կատարման, հետևաբար` նաև ՀՀ Սահմանադրությամբ պետության առջև դրված սահմանադրաիրավական խնդիրների իրագործման երաշխիք են»:

Սույն համաձայնագրի առնչությամբ ՀՀ սահմանադրական դատարանը նույնպես գտնում է, որ անհրաժեշտ է վարկային միջոցների նպատակային օգտագործման նկատմամբ գործուն վերահսկողական կառուցակարգերի արմատավորում:

Ելնելով գործի քննության արդյունքներից և ղեկավարվելով Հայաստանի Հանրապետության Սահմանադրության 100-րդ հոդվածի 2-րդ կետով, 102-րդ հոդվածի առաջին և չորրորդ մասերով, «Սահմանադրական դատարանի մասին» Հայաստանի Հանրապետության օրենքի 63 և 64-րդ հոդվածներով, Հայաստանի Հանրապետության սահմանադրական դատարանը որոշեց.

1. Հայաստանի Հանրապետության և Եվրասիական զարգացման բանկի միջև 2015 թվականի ապրիլի 14-ին ստորագրված` «Հյուսիս-հարավ» ավտոճանապարհային միջանցքի շինարարության (4-րդ հերթ) նախագծի ֆինանսավորման համար Եվրասիական տնտեսական ընկերակցության հակաճգնաժամային հիմնադրամի միջոցներից ներդրումային վարկի տրամադրման մասին համաձայնագրում ամրագրված պարտավորությունները համապատասխանում են Հայաստանի Հանրապետության Սահմանադրությանը:

2. Հայաստանի Հանրապետության Սահմանադրության 102-րդ հոդվածի երկրորդ մասի համաձայն սույն որոշումը վերջնական է և ուժի մեջ է մտնում հրապարակման պահից:

Նախագահող	Գ. Հարությունյան
11 հունիսի 2015 թ. ՍԴՈ-1219