ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

13 փետրվարի 2014 թվականի N 136-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾԱԿԱՆ ՏՎՅԱԼՆԵՐԻ ՏԵՂԵԿԱՏՎԱԿԱՆ ԵՆԹԱԿԱՌՈՒՑՎԱԾՔԻ ԿԱԶՄԸ, ՁԵՎԱՎՈՐՄԱՆ ԵՎ ՎԱՐՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Համաձայն «Գեոդեզիայի և քարտեզագրության մասին» Հայաստանի Հանրապետության օրենքի 11-րդ հոդվածի 7-րդ կետի պահանջների` Հայաստանի Հանրապետության կառավարությունը որոշում է.

1. Հաստատել Հայաստանի Հանրապետության տարածական տվյալների տեղեկատվական ենթակառուցվածքի կազմը, ձևավորման և վարման կարգը` համաձայն հավելվածի:

2. Հայաստանի Հանրապետության կառավարությանն առընթեր անշարժ գույքի կադաստրի պետական կոմիտեի նախագահին` սույն որոշումն ուժի մեջ մտնելուց հետո մեկամյա ժամկետում ընդունել սույն որոշմամբ հաստատված կարգից բխող իրավական ակտեր:

3. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության վարչապետ	Տ. Սարգսյան
2014 թ. փետրվարի 18 Երևան

Հավելված ՀՀ կառավարության 2014 թվականի փետրվարի 13-ի N 136-Ն որոշման

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾԱԿԱՆ ՏՎՅԱԼՆԵՐԻ ՏԵՂԵԿԱՏՎԱԿԱՆ ԵՆԹԱԿԱՌՈՒՑՎԱԾՔԻ ԿԱԶՄԸ, ՁԵՎԱՎՈՐՄԱՆ ԵՎ ՎԱՐՄԱՆ ԿԱՐԳԸ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով կարգավորվում են Հայաստանի Հանրապետության տարածական տվյալների տեղեկատվական ենթակառուցվածքի (այսուհետ` ՏՏՏԵ) կազմի, ձևավորման, վարման հետ կապված հարաբերությունները:

II. ՀԻՄՆԱԿԱՆ ՀԱՍԿԱՑՈՒԹՅՈՒՆՆԵՐԸ

2. Սույն կարգում օգտագործվել են հետևյալ հիմնական հասկացությունները`

1) տարածական օբյեկտ` ցանկացած կոնկրետ օբյեկտ, որը կարող է որոշվել առանձնահատուկ բովանդակությամբ ու սահմաններով և ներկայացվել որպես թվային տվյալների բազա.

2) բազային տարածական տվյալներ` գաղտնիություն չպարունակող, բաց հրապարակման համար նախատեսված, ժամանակի մեջ կայուն տարածական դիրքով առանձնացվող և այլ տարածական օբյեկտների համար կողմնորոշման հիմք հանդիսացող, առավել օգտագործվող տարածական օբյեկտների թվային տվյալներ.

3) Հայաստանի Հանրապետության տարածքի ՏՏՏԵ-ի տարածաշրջանային օպերատոր (այսուհետ` օպերատոր)` Հայաստանի Հանրապետության կառավարությանն առընթեր անշարժ գույքի կադաստրի պետական կոմիտեի (այսուհետ` լիազոր մարմին) աշխատակազմի «Տեղեկատվական տեխնոլոգիաների կենտրոն» ստորաբաժանումը, որը սույն կարգով և Հայաստանի Հանրապետության օրենսդրությանը համապատասխան իրականացնում է Հայաստանի Հանրապետության տարածքում մատակարարի կողմից իրեն տրամադրված տարածական տվյալների ինտեգրման գործառույթ.

4) տարածական տվյալների մատակարարներ (այսուհետ` մատակարարներ)` Հայաստանի Հանրապետության օրենսդրությանը համապատասխան` օպերատորին տարածական տվյալներ տրամադրող պետական կառավարման և տեղական ինքնակառավարման մարմիններ, ինչպես նաև իրավաբանական անձինք.

5) տարածական տվյալներ օգտագործողներ (սպառողներ)` ցանկացած իրավաբանական և ֆիզիկական անձինք, որոնք տարբեր նպատակներով օգտագործում են օպերատորի կողմից տրամադրված տարածական տվյալները, այդ թվում` համացանցում ստեղծված գեոպորտալի միջոցով.

6) գեոպորտալ` համացանցային միջոց` Հայաստանի Հանրապետության տարածական տվյալների բազա մուտք գործելու համար, որով ապահովվում են մետատվյալների որոնումը, ուսումնասիրումը, բեռնավորումը, ինչպես նաև տարածական տվյալների հրապարակումը թույլատրելիության շրջանակներում:

III. ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾԱԿԱՆ ՏՎՅԱԼՆԵՐԻ ՏԵՂԵԿԱՏՎԱԿԱՆ ԵՆԹԱԿԱՌՈՒՑՎԱԾՔԸ

3. ՏՏՏԵ-ն տեղեկատվական ռեսուրսների ամբողջականություն է, որը նախատեսված է տարածական տվյալների հավաքագրման, մշակման, վերլուծության, արդիականացման, պահպանման և սպառողին տվյալներ տրամադրելու համար: ՏՏՏԵ-ն բաղկացած է պետական տարածական տվյալների բանկից, ճյուղային, տարածքային և համայնքային տարածական տվյալների բանկից, մետատվյալների բանկից:

4. ՏՏՏԵ-ում ընդգրկված բոլոր բազային տարածական տվյալները պարտադիր են Հայաստանի Հանրապետության պետական կառավարման և տեղական ինքնակառավարման մարմինների համար` երկրատեղեկատվական համակարգերում օգտագործման նպատակով`

1) պետական (բազային) տարածական տվյալներն այն տվյալներն են, որոնք սահմանված կարգով ստեղծվում և թարմացվում են լիազոր մարմնի կողմից.

2) ճյուղային տարածական տվյալներն այն տվյալներն են, որոնք ստեղծվում և վարվում են համապատասխան բնագավառի պետական կառավարման մարմինների կողմից.

3) տարածքային և համայնքային տարածական տվյալները ներառում են համայնքի կողմից վարվող տնտեսության աշխարհագրական տարրերը.

4) մետատվյալները տեղեկություններ են տվյալների մասին (աերոլուսանկարի ստեղծման տարեթիվը, կոորդինատային համակարգը, ընդգրկող տարածքը, չափսերը և այլն):

5. Բազային տարածական տվյալների օբյեկտների ցանկում ներառվում են Հայաստանի Հանրապետության տարածքի հետևյալ տարածական օբյեկտները`

1) պետական գեոդեզիական ցանցի կետերը.

2) վարչատարածքային բաժանման միավորները, այդ թվում` Հայաստանի Հանրապետության, նրա մարզերի, համայնքների և բնակավայրերի սահմանները.

3) կադաստրային միավորների օբյեկտները, որոնք հաշվառված են լիազորված մարմնի շտեմարանում.

4) կապիտալ շինարարության (շենքեր, շինություններ) օբյեկտները` հասցեավորման տեղեկատվությամբ, պետական, տարածաշրջանային (ռեգիոնալ) և համայնքային նշանակության գծային կառույցներով (ավտոճանապարհային և երկաթուղային ցանց, խողովակաշարեր, էլեկտրացանցեր և այլն).

5) անտառային հողերի տարածական միավորներն ու օբյեկտները.

6) ջրային ռեսուրսները.

7) ճանապարհային ցանցի օբյեկտները.

8) բնության հատուկ պահպանվող տարածքները` արգելոցները, արգելավայրերը, ազգային պարկերը, բնության հուշարձանները և դենդրոպարկերը.

9) պատմամշակութային անշարժ հուշարձանների` հատուկ պահպանվող և դրանց պահպանական գոտիների համակարգերի տարածքները.

10) քաղաքաշինական կարգավորման գծերը.

11) հասցեները.

12) ռելիեֆի թվային մոդելները.

13) աշխարհագրական օբյեկտների անվանումները.

14) լանդշաֆտային համալիրները:

6. Բազային տարածական տվյալների ցանկում կարող են լրացուցիչ ընդգրկվել սույն կարգի 17-րդ կետով ստեղծվող միջգերատեսչական աշխատանքային խմբի կողմից առաջարկված այլ օբյեկտներ:

7. Բազային տարածական տվյալների նկարագրման պահանջների մշակման ժամանակ կիրառվում է տարածական օբյեկտների կոորդինատային տվյալների հետ օգտագործման սկզբունքը, որն առավելագույնս ապահովում է տարածական օբյեկտների կոորդինատային տվյալների ճշգրտությունը, նկարագրման լիարժեքությունը, հավաստիությունը և դրա իրավական նշանակությունը:

8. Մատակարարների կողմից տարածական տվյալներն օպերատորին փոխանցվում են էլեկտրոնային փոստի և (կամ) թվային կրիչի միջոցով:

9. Ստացված տարածական տվյալները քննարկվում են միջգերատեսչական աշխատանքային խմբի կողմից: Քննարկման ընթացակարգը սահմանում է լիազոր մարմինը:

10. Սպառողների (օգտագործողների) մուտքը բազային տարածական տվյալներ ապահովվում է օպերատորի կողմից` Հայաստանի Հանրապետության գեոպորտալի միջոցով, լիազոր մարմնի ղեկավարի հրամանով հաստատված հրահանգի հիման վրա:

11. Ճյուղային տարածական տվյալների կազմը և տարածական տվյալների նկարագրման պահանջները որոշվում են ՏՏՏԵ-ի տարածական օբյեկտների նկարագրման ընդհանուր պահանջներին համապատասխան:

12. Ճյուղային տարածական տվյալների կիրառումը պարտադիր է տվյալներ տրամադրած համապատասխան պետական կառավարման մարմինների կողմից օգտագործման համար:

13. Ճյուղային տարածական տվյալների ստեղծման ժամանակ պարտադիր պետք է օգտագործվեն բազային տարածական տվյալները:

IV. ՏԱՐԱԾԱԿԱՆ ՏՎՅԱԼՆԵՐԻ ՏԵՂԵԿԱՏՎԱԿԱՆ ԵՆԹԱԿԱՌՈՒՑՎԱԾՔԻ ՆՊԱՏԱԿՆԵՐԸ

14. ՏՏՏԵ-ի ստեղծման և զարգացման նպատակն ապահովելն է պետական կառավարման և տեղական ինքնակառավարման մարմինների, կազմակերպությունների ու քաղաքացիների ազատ մուտքը ՏՏՏԵ:

15. ՏՏՏԵ-ի հիմնական նպատակը մատակարարների և սպառողների լայն շրջանների կողմից տարածական տվյալների ստեղծման ու օգտագործման արդյունավետությունը մեծացնելն է:

V. ՏԱՐԱԾԱԿԱՆ ՏՎՅԱԼՆԵՐԻ ՏԵՂԵԿԱՏՎԱԿԱՆ ԵՆԹԱԿԱՌՈՒՑՎԱԾՔԻ ԽՆԴԻՐՆԵՐԸ

16. ՏՏՏԵ-ի խնդիրներն են`

1) Հայաստանի Հանրապետության տարածքում միասնական կոորդինատային հիմքի պահպանման ապահովումն ու օգտագործումը` Հայաստանի Հանրապետությունում մշտական գործող ռեֆերենց կայանների ցանցի ստեղծման և օգտագործման, ինչպես նաև Հայաստանի Հանրապետության տարածքի բազային տարածական տվյալների ստեղծման ու արդիականացման հաշվին.

2) Հայաստանի Հանրապետության պետական կառավարման մարմինների, տեղական ինքնակառավարման մարմինների կողմից նոր տարածական տվյալների ստեղծման համար կանոնակարգված կոորդինատային համակարգի և բազային տարածական տվյալների օգտագործման պարտադիր պայմանների ապահովումը.

3) ճյուղային տարածական տվյալների ստեղծումը, վարումը և արդիականացումը.

4) բազային տարածական տվյալների և սպառողների (օգտագործողների) բաց հրապարակման ենթակա տարածական տվյալների մուտքի ապահովումը` գեոպորտալի միջոցով.

5) տարածական տվյալների մատակարարների միասնական ստանդարտների և տարածական տվյալների ձևավորման կանոնների հիման վրա տարբեր տարածական տվյալների համատեղելիության և ինտեգրման ապահովումը.

6) Հայաստանի Հանրապետության տարածքում տարածական տվյալների որակի և ճշգրտության բարձրացումը:

VI. ՏԱՐԱԾԱԿԱՆ ՏՎՅԱԼՆԵՐԻ ՏԵՂԵԿԱՏՎԱԿԱՆ ԵՆԹԱԿԱՌՈՒՑՎԱԾՔԻ ԿԱԶՄԱԿԵՐՊՉԱԿԱՆ ԿԱՌՈՒՑՎԱԾՔԸ

17. ՏՏՏԵ-ի կազմակերպչական աշխատանքներն առավել արդյունավետ և համակարգված իրականացնելու նպատակով Հայաստանի Հանրապետության վարչապետի որոշմամբ ստեղծվում է միջգերատեսչական աշխատանքային խումբ, որի կազմը հաստատում է լիազոր մարմինը:

18. Լիազոր մարմինը ՏՏՏԵ-ի ստեղծման և զարգացման շրջանակներում իրականացնում է հետևյալ գործառույթները`

1) նորմատիվ-տեխնիկական փաստաթղթերի մշակում.

2) ՏՏՏԵ-ի ստեղծման և զարգացման շրջանակներում պետական կառավարման մարմինների հետ համագործակցությանը մասնակցություն.

3) պետական կառավարման և տեղական ինքնակառավարման մարմինների կողմից բազային, ճյուղային, տարածքային ու համայնքային տարածական տվյալների և մետատվյալների կազմի մշակմանը, ստեղծմանը, արդիականացմանը, տրամադրմանն ու օգտագործմանն աջակցության ցուցաբերում:

19. Օպերատորն իրականացնում է հետևյալ գործառույթները`

1) տարածական տվյալների շարքը դասելու նպատակով տարածական տվյալների աղբյուրների գույքագրում.

2) տարածական տվյալների մատակարարի կողմից իրեն տրամադրվող տարածական տվյալների մշակում, ճշգրտում, հավաստիության պարզում, վերլուծություն.

3) արդիականության պահպանում և սպառողների համար գեոպորտալի հասանելիության ապահովում.

4) տեղեկատուների, դասակարգիչների և ՏՏՏԵ-ի գրանցամատյանների վարում, որոնք ապահովում են մասնակիցների, տարածական տվյալների, մետատվյալների և ՏՏՏԵ-ի ծառայությունների ճանաչումն ու կարգավիճակը:

VII. ՏԱՐԱԾԱԿԱՆ ՏՎՅԱԼՆԵՐԻ ՏԵՂԵԿԱՏՎԱԿԱՆ ԵՆԹԱԿԱՌՈՒՑՎԱԾՔԻ ՏԵԽՆՈԼՈԳԻԱԿԱՆ ԱՊԱՀՈՎՈՒՄԸ

20. ՏՏՏԵ-ի տեխնոլոգիական ապահովման կազմի մեջ մտնում են`

1) Հայաստանի Հանրապետությունում մշտական գործող ռեֆերենց կայանների ցանցը (Հայաստանի Հանրապետության պետական (ազգային) պլանային ցանցի բաղադրիչ մասը)` բարձր ճշգրտությամբ արբանյակային դիրքորոշման համակարգը, որն ուղղված է պետական գեոդեզիական ցանցի տարածաշրջանային հատվածի օգտագործման արդյունավետության մեծացմանը.

2) Հայաստանի Հանրապետության պետական և տեղական ինքնակառավարման մարմինների միասնական երկրատեղեկատվական համակարգը, որն ապահովում է տարածական տվյալների ստեղծումը, արդիականացումը, պահպանումը, մատչելիությունը և որակի վերահսկումը.

3) տվյալների մշակման կենտրոնը, որն ապահովում է տարածական տվյալների, մետատվյալների և ՏՏՏԵ-ի տեղեկատվական տվյալների կանոնակարգված պահպանումն ու տրամադրումը.

4) Հայաստանի Հանրապետության գեոպորտալը:

Հայաստանի Հանրապետության կառավարության աշխատակազմի ղեկավար-նախարար

Վ. Գաբրիելյան