«Գրանցված է»

ՀՀ արդարադատության

նախարարության կողմից

13 դեկտեմբերի 2012 թ.

Պետական գրանցման թիվ 05012446

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

27 նոյեմբերի 2012 թ.

թիվ 332-Ն

Ո Ր Ո Շ ՈՒ Մ

ՆԵՐԴՐՈՒՄԱՅԻՆ ԸՆԿԵՐՈՒԹՅՈՒՆՆԵՐԻՆ ԼՐԱՑՈՒՑԻՉ ԳՈՐԾՈՒՆԵՈՒԹՅԱՆ ՏԵՍԱԿՆԵՐ ԹՈՒՅԼԱՏՐԵԼՈՒ ԵՎ ԴՐԱՆՑ ԻՐԱԿԱՆԱՑՄԱՆ ՀԱՄԱՐ ՊԱՀԱՆՋՆԵՐ ՍԱՀՄԱՆԵԼՈՒ ՄԱՍԻՆ

Նպատակ ունենալով խթանել ներդրումային ընկերությունների կողմից մատուցվող ծառայությունների և իրականացվող գործունեության տեսակների քանակի և ծավալի աճը՝

հիմք ընդունելով «Արժեթղթերի շուկայի մասին» Հայաստանի Հանրապետության օրենքի 28-րդ հոդվածի 2-րդ մասը, ղեկավարվելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ հոդվածի «ե» կետով, «Իրավական ակտերի մասին» Հայաստանի Հանրապետության օրենքի 16-րդ հոդվածով` Հայաստանի Հանրապետության կենտրոնական բանկի խորհուրդը որոշում է.

1. Թույլատրել ներդրումային ընկերություններին, որպես ներդրումային ընկերության գործունեության հետ սերտորեն առնչվող լրացուցիչ գործունեության տեսակ` իրականացնել ֆինանսական շուկայի և ներդրումային ծառայությունների վերաբերյալ ֆինանսական գրագիտության բարձրացման հետ կապված գործունեություն:

2. Մինչև սույն որոշման 1-ին կետով նախատեսված լրացուցիչ գործունեության իրականացումը ներդրումային ընկերությունը պետք է ստանա Հայաստանի Հանրապետության կենտրոնական բանկի վերահսկողության համար պատասխանատու ստորաբաժանման նախնական համաձայնությունը՝ ներկայացնելով գործունեության իրականացման ռազմավարությունը, կրթական ծրագիրը, գործունեության իրականացման ձևերը, կարգը և պայմանները սահմանող ներքին իրավական ակտերը, ինչպես նաև այդ գործունեության հետ կապված ամբողջական այլ տեղեկություններ:

3. Ներդրումային ընկերությունը Հայաստանի Հանրապետության կենտրոնական բանկի վերահսկողության համար պատասխանատու ստորաբաժանման նախնական համաձայնությանն է ներկայացնում նաև սույն որոշման 2-րդ կետով նախատեսված լրացուցիչ գործունեության իրականացման ռազմավարության, կրթական ծրագրի, գործունեության իրականացման ձևերը, կարգն ու պայմանները սահմանող ներքին իրավական ակտերի փոփոխությունները, ինչպես նաև այդ գործունեության հետ կապված այլ տեղեկությունների փոփոխությունները:

4. Հայաստանի Հանրապետության կենտրոնական բանկի վերահսկողության համար պատասխանատու ստորաբաժանման կողմից պահանջվող բոլոր փաստաթղթերը ստանալուց հետո 7 աշխատանքային օրվա ընթացքում դիմումը չմերժելու և/կամ այլ կերպ չարձագանքելու դեպքում նախնական համաձայնությունը համարվում է տրամադրված:

5. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

ՀՀ կենտրոնական բանկի նախագահ	Ա. Ջավադյան
2012 թ. դեկտեմբերի 3 Երևան