«Գրանցված է»

ՀՀ արդարադատության

նախարարության կողմից

13 դեկտեմբերի 2012 թ.

Պետական գրանցման թիվ 05012443

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

27 նոյեմբերի 2012 թ.

թիվ 329-Ն

Ո Ր Ո Շ ՈՒ Մ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ԽՈՐՀՐԴԻ 2007 ԹՎԱԿԱՆԻ ՆՈՅԵՄԲԵՐԻ 16-Ի ԹԻՎ 366-Ն ՈՐՈՇՄԱՆ ՄԵՋ ԼՐԱՑՈՒՄՆԵՐ ԵՎ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

Նպատակ ունենալով ապահովագրական ընկերությունների կողմից Հայաստանի Հանրապետության կենտրոնական բանկ ներկայացվող հաշվետվությունները համապատասխանեցնել ապահովագրական ընկերությունների նորմատիվների հաշվարկման համակարգում կատարված փոփոխություններին,

հիմք ընդունելով «Ապահովագրության և ապահովագրական գործունեության մասին» Հայաստանի Հանրապետության օրենքի 85-րդ հոդվածի 2-րդ մասը և ղեկավարվելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ հոդվածի «ե» կետով, «Իրավական ակտերի մասին» Հայաստանի Հանրապետության օրենքի 16-րդ հոդվածով և 70-րդ հոդվածի 1-ին մասով` Հայաստանի Հանրապետության կենտրոնական բանկի խորհուրդը որոշում է.

1. Հայաստանի Հանրապետության կենտրոնական բանկի խորհրդի 2007 թվականի նոյեմբերի 16-ի ««Ապահովագրական ընկերությունների հաշվետվությունների ձևերը, դրանցում ներառվող տեղեկատվությունը, ներկայացնելու կարգը և ժամկետները» կանոնակարգ 3/04-ը հաստատելու մասին» թիվ 366-Ն որոշմամբ հաստատված «Ապահովագրական ընկերությունների հաշվետվությունների ձևերը, դրանցում ներառվող տեղեկատվությունը, ներկայացնելու կարգը և ժամկետները» կանոնակարգ 3/04-ում (այսուհետ՝ Կանոնակարգ 3/04) կատարել հետևյալ լրացումներն ու փոփոխությունները.

1) Կանոնակարգ 3/04-ը լրացնել 57.1 կետով՝ հետևյալ բովանդակությամբ.

«57.1. Թիվ 3 հաշվետվության 12.1 աղյուսակում վարկային ռիսկի հաշվարկման նպատակով ներկայացվում է ներդրումային ֆոնդերի նկատմամբ պահանջները (այդ թվում՝ այլ անձանց նկատմամբ պահանջների այն մասը, որը ՎՌԶՄ կիրառման արդյունքում պետք է ստանան ներդրումային ֆոնդերի համար նախատեսված ռիսկի կշիռները): 12.1-րդ աղյուսակի 1-ին սյունակը լրացվում է ըստ հաշվետու ամսվա օրերի հաջորդականության (1, 2, 3,,, 31, որտեղ «1»-ը համընկնում է ամսվա առաջին օրվան, «2»-ը՝ երկրորդ օրվան և այլն): Ընդ որում, եթե միևնույն օրվա հաշվարկում առկա են տարբեր ռիսկի կշիռ ունեցող ներդրումային ֆոնդերի նկատմամբ պահանջներ, ապա այդ պահանջների վերաբերյալ տեղեկությունները լրացվում են առանձին տողերով: 12.1-րդ աղյուսակի 2-րդ սյունակում լրացվում է Կանոնակարգ 3/02-ի համաձայն հաշվարկված ներդրումային ֆոնդերի նկատմամբ պահանջների ռիսկի կշիռները` ստորակետից հետո 5 նիշի ճշտությամբ: 12.1 աղյուսակի 3-րդ սյունակում լրացվում է ներդրումային ֆոնդերի նկատմամբ այն պահանջների մեծությունը` հնարավոր կորուստների պահուստները նվազեցնելուց հետո, որոնց վրա չի տարածվում ՎՌԶՄ-ն: 12.1 աղյուսակի 4-րդ սյունակում լրացվում են ներդրումային ֆոնդերի նկատմամբ ՎՌԶՄ-ին ենթակա պահանջների մեծությունները` հնարավոր կորուստների պահուստները նվազեցնելուց հետո: Ընդ որում, տվյալ պահանջների վերաբերյալ տեղեկատվությունը լրացվում է նաև սույն հաշվետվության 10-րդ աղյուսակի 1-ից 4-րդ սյունակներում, իսկ այդ պահանջների ռիսկով կշռված մեծությունը` 10-րդ աղյուսակի 18-րդ սյունակում: 12.1 աղյուսակի 5-րդ սյունակում լրացվում են ներդրումային ֆոնդերի գծով այն արտահաշվեկշռային պայմանական պարտավորությունների և արտահաշվեկշռային ածանցյալ գործիքների գումարները` հնարավոր կորուստների պահուստները նվազեցնելուց և ՎՌՓԳ կիրառելուց հետո, որոնց վրա չի տարածվում ՎՌԶՄ-ն: Ընդ որում, արտահաշվեկշռային պայմանական պարտավորությունների և արտահաշվեկշռային ածանցյալ գործիքների վերաբերյալ տեղեկատվությունը լրացվում է նաև սույն հաշվետվության 11-րդ աղյուսակի 1-ից 12-րդ սյունակներում, իսկ դրանց ռիսկով կշռված մեծությունը` 11-րդ աղյուսակի 26-րդ սյունակում: 12.1 աղյուսակի 6-րդ սյունակում լրացվում են ներդրումային ֆոնդերի գծով այն արտահաշվեկշռային պայմանական պարտավորությունները և արտահաշվեկշռային ածանցյալ գործիքները` հնարավոր կորուստների պահուստները նվազեցնելուց և ՎՌՓԳ կիրառելուց հետո, որոնց վրա տարածվում է ՎՌԶՄ-ն: Ընդ որում, արտահաշվեկշռային պայմանական պարտավորությունների և արտահաշվեկշռային ածանցյալ գործիքների վերաբերյալ տեղեկատվությունը լրացվում է նաև սույն հաշվետվության 12-րդ աղյուսակի 1-ից 14-րդ սյունակներում, իսկ դրանց ռիսկով կշռված մեծությունը` 12-րդ աղյուսակի 28-րդ սյունակում: Եթե 1-ին սյունակում լրացվող հաշվետու ամսվա օրերը և 2-րդ սյունակում լրացվող ռիսկի կշիռները համընկնում են, ապա 12.1 աղյուսակի 3-ից 6-րդ սյունակներում լրացվում են ներդրումային ֆոնդերի նկատմամբ պահանջների մեծությունների հանրագումարները: Այն դեպքում, երբ ներդրումային ֆոնդերի նկատմամբ պահանջները կամ դրանց մի մասը ՎՌԶՄ կիրառման արդյունքում պետք է ստանան այլ անձանց համար նախատեսված ռիսկի կշիռները, ապա այդ պահանջները չեն լրացվում 12.1 աղյուսակում և լրացվում են 10-րդ կամ 12-րդ աղյուսակներում:»:

2) Կանոնակարգ 3/04-ի 64-րդ կետ շարադրել հետևյալ խմբագրությամբ.

«64. Թիվ 3 հաշվետվության 18-րդ աղյուսակում արտացոլվում է տեխնիկական պահուստներին համարժեք ակտիվների կազմը: 18-րդ աղյուսակի 1-3-րդ սյունակներում լրացվում են կանոնակարգ 3/02-ի 30-րդ կետի աղյուսակի 1-ին կետում սահմանված ակտիվները, 4-7-րդ սյունակներում լրացվում են նշված աղյուսակի 2-րդ կետում նշված ակտիվները, 8-17-րդ սյունակներում` 3-րդ կետում նշված ակտիվները, 18-21-րդ սյունակներում` 4-րդ կետում նշված ակտիվները, 22-29-րդ սյունակներում` 5-րդ կետում նշված ակտիվները, 30-35-րդ սյունակներում՝ 6-րդ կետում նշված ակտիվները, 36-րդ սյունակում լրացվում են տեխնիկական պահուստների մեծությունների հանրագումարը` նվազեցրած վերաապահովագրողների մասնաբաժնի չափով: 22-րդ, 24-րդ, 26-րդ և 28-րդ սյունակներում նշվում են Հայաստանի Հանրապետության տարածքում գործող միայն այն բանկի գծով համապատասխան ակտիվների մեծությունները, որի գծով բանկային հաշիվների, ցպահանջ ավանդների, ժամկետային ավանդների և տրամադրված փոխառությունների հանրագումարը առավելագույնն է: Օրինակ, եթե A բանկում բանկային հաշվի մեծությունը 100 միավոր է, ցպահանջ ավանդի մեծությունը՝ 60 միավոր, ժամկետային ավանդի մեծությունը՝ 80, տրամադրված փոխառության մեծությունը՝ 50, B բանկում համապատասխանաբար՝ 180, 50, 0, 30, C բանկում համապատասխանաբար՝ 150, 80, 70, 60, ապա հաշվետվության մեջ լրացվում են C բանկի համապատասխան ակտիվների մեծությունը: Այն օրերին, երբ ապահովագրական ընկերության հաշվեկշիռը փոփոխություններ չի կրել (ներառյալ` ոչ աշխատանքային օրերը), լրացվում են նախորդ օրվա տվյալները:»:

3) Կանոնակարգ 3/04-ի Հավելված 3-ի 11-րդ և 12-րդ աղյուսակներից հանել բոլոր «/բացառությամբ՝ արժութային սվոփի/» բառերը:

4) Կանոնակարգ 3/04-ի Հավելված 3-ը լրացնել 12.1 աղյուսակով՝ համաձայն սույն որոշման Հավելված 1-ի:

5) Կանոնակարգ 3/04-ի Հավելված 3-ի 18-րդ աղյուսակը շարադրել նոր խմբագրությամբ՝ համաձայն սույն որոշման Հավելված 2-ի:

2. Սույն որոշումն ուժի մեջ է մտնում սույն որոշման ընդունման օրվան հաջորդող վեցամսյա ժամկետին հաջորդող ամսվա 1-ին, բացառությամբ սույն որոշման 2-րդ և 5-րդ կետերի, որոնք ուժի մեջ են մտնում պաշտոնական հրապարակման օրվան հաջորդող տասներորդ օրը:

ՀՀ կենտրոնական բանկի նախագահ	Ա. Ջավադյան
2012 թ. դեկտեմբերի 3 Երևան

Հավելված 1   Հաստատված է ՀՀ կենտրոնական բանկի խորհրդի 2012 թվականի նոյեմբերի 27-ի թիվ 329-Ն որոշմամբ Աղյուսակ 12.1

 

(հազ. դրամ)

Ներդրումային ֆոնդերի նկատմամբ պահանջների վարկային ռիսկի հաշվարկը (9-12-րդ աղյուսակներում ներառելու համար)
Ամսվա օրեր	Ռիսկի կշիռ	Ներդրումային ֆոնդերի նկատմամբ պահանջի մեծությունը հնարավոր կորուստների պահուստը նվազեցնելուց հետո (ակտիվներ, որոնց վրա չեն տարածվում ՎՌԶՄ-ները)	Ներդրումային ֆոնդերի նկատմամբ պահանջի մեծությունը հնարավոր կորուստների պահուստը նվազեցնելուց հետո (ՎՌԶՄ-ի ենթակա ակտիվներ)	Ներդրումային ֆոնդերի նկատմամբ պահանջի մեծությունը հնարավոր կորուստների պահուստը նվազեցնելուց հետո (արտահաշվեկշռային ածանցյալ գործիքներ և արտահաշվեկշռային պայմանական պարտավորություններ, որոնց վրա չեն տարածվում ՎՌԶՄ-ները)	Ներդրումային ֆոնդերի նկատմամբ պահանջի մեծությունը հնարավոր կորուստների պահուստը նվազեցնելուց հետո (արտահաշվեկշռային ածանցյալ գործիքներ և արտահաշվեկշռային պայմանական պարտավորություններ, որոնց վրա տարածվում են ՎՌԶՄ-ները)
1	2	3	4	5	6

Հավելված 2   Հաստատված է ՀՀ կենտրոնական բանկի խորհրդի 2012 թվականի նոյեմբերի 27-ի թիվ 329-Ն որոշմամբ